Eiruka thiam loh chang IAS officer-in Sorkar hna a la thawk chhunzawm

Aizawl district-a Special Court (Prevention of Corruption Act)-in kumin May thlaa eiruk thubuaia thiam loh a chantir Rodney L Ralte, IAS chuan tun thlengin dan pangngaiin sorkarah hna an la thawk chhunzawm zel. Special Court-in eirûk thubuaiah May 27, 2019-a thiam loh chantir a, jail-a táng tur leh pawisa chawi tura a tih, Rodney L Ralte, IAS chuan Mizoram sorkarah hna a la thawk chhunzawm zel.

September 4, 2019-a Mizoram sorkarin secretary-te department enkawl a tihchhuah thar ang chuan, Local Administration Department leh District Council & Minority Affairs department-te a enkawl mek. Thu dawn danin, Rodney L Ralte hian Special Court (PC Act) thutlukna hi Gauhati High Court-ah a khing let (appeal) a; High Court chuan thutlukna a siam hma chuan Special Court-in hremna tura a lo tih tawh chu kalpui rih loh turin a dah phawt a ni. Thubuai a la tawp lo a, la ngaihtuah chhunzawm zel tur a nih thu, thu dawnna chuan a sawi.

Tarlan tawh angin, Mizoram sorkara secretary Rodney Lalrinawma Ralte, IAS chu Special Court (PC Act) chuan sorkar sum tihchingpen thubuaiah thiam loh a chantir a, May 27, 2019 khan kum thum chhung jail-a táng tur leh Rs. 5,00,000 chawi turin a hrem.

Rodney L Ralte hi Mamit DC a nih laiin Dampa Tiger Reserve area aṭanga Andermanik khaw sawnna tur sum cheng nuai tam tak tichingpenah puh a ni a, a lakah May 31, 2013-ah thubuai ziah luh a ni. Thubuai chhuina report (chargesheet) chu December 15, 2017-ah Court-ah theh­luh a ni a, chargesheet-a tarlan dan chuan, Rodney L Ralte hian cheng nuai 14 a tichingpen a ni.

Special Court vêkin kumin May 8-ah thutlukna siam a, jail-a táng tur leh pawisa chawi tura a tih Lalrempuii Fanai, MCS pawhin Mizoram sorkar hnuaiah hna a la chhunzawn zel a, tunah hian deputy secretary a ni a, Irrigation and Water Resources department leh Parliamentary Affairs department-te a chang mek nia thu dawn a ni.

Special Court (PC Act)-in May 8, 2019-a eiruk thubuaia thiam loh a chantir Lalrempuii Fanai, MCS chu Court-in jail-a táng turin ti mah se, a táng rih lo a; a tàn loh chhan chu a hriselna dinhmun ṭhat tâwk loh vang nia thu dawn a ni. Tàntir a nih loh avang hian Secretariat lamah pisa a kai ṭhin.

Special Court-in thutlukna a siam hma, case a kal reng laiin Mizoram sorkarin department proceeding lain Lalrempuii Fanai chu a lo hrem tawh a, a dinhmun pangngai aia hniamah a dah. Sorkarin action a lak hun a zo a, Lalrempuii pawh hi kaisang ve leh tawhin, Selection Grade a ni mek a; mahse, sorkarin a tlakhniamtir avangin service-a a tlukpui ṭhinte aiin a hniam tawh thung.

Tarlan tawh angin, Lalrempuii Fanai hi Special Court (PC Act) chuan kum 2008-ah State Institute of Rural Development (SIRD) project director hna a thawh laiin, computer supply-naa sum hlêp rûa puhnaah thiam loh a chantir a, hrehawm taka kum nga chhung táng tur leh Rs. 5,00,000 cháwi turin a hrem. Lalrempuii hi computer 150 supply-naah computer supply-tu Emperor, Aizawl nen inthurual­in, chan insemin sorkar sum eng emaw zat hlêp rua puh a ni.

Mizoram sorkar officer hlui, kum 30 chuang thawka pension tawh, sorkar hnathawk inrêlbàwlna lam hun rei tak khawih tawh sawi danin, Mizoram sorkar hnathawkte criminal case-ah thiam loh chantir (convict) an nih chuan, department proceeding lak theih a ni a; chutih rualin, Court-in a convict hma pawhin sorkarin a duh chuan a hrem thei bawk.

Sorkar hnathawkin thil sual a tih avanga sorkarin a laka hremna a lek leh Court-in thiam loh a chantira a hremna chu thil hrang a ni a; Court-in a hremna bakah, sorkarin ṭul a tih chuan a hranpain a hrem ve leh thei a ni. Rodney L Ralte chu all India service (IAS) a nih avangin action lak a ṭul pawhin, action latu tur chu Ministry of Home Affairs (MHA) a nih thu, Mizoram sorkara officer pension tawh pakhat chuan a sawi a, "Mizoram sorkarin ama thuin action a la ngawt thei lo. State sorkarin a duh chuan MHA-ah a chungchang chu a hriattir thei a, MHA lamin a rawn zawtfiah thei bawk," a ti.