Lo neitute tana pension scheme duan thar Mizorama hman ṭan theih turin hawn a ni

Sorkar laipuiin lo neitute tana pension scheme a duan Farmers' Pension Scheme, Pradhan Mantri Kisan Maandhan Yojana (PMKMY) chu nimin khan Assembly Annexe conference hall-ah Mizorama hman ṭan theih turin Agriculture minister C Lalrinsanga'n a hawng.

PMKMY hawn inkhawm hi Agriculture secretary Lalhmingthanga'n a kaihruai a; C Lalrinsanga chuan, Mizote chu pipú aṭanga lo neia ei zawng an nih thu sawiin, "Kan pi leh pute hunah buh leh bâlah harsatna an neih kan hre lo.

Thawkmawh deuh chhungkuate chu an inkhai chhuak ṭhin. Kum khat tla tur buh an thar chuan an duh tâwk mai. Ram a ṭhang zel a, thil chi hrang hrangin kawng tam takah kan ngaihtuahna a tibuai a ni," a ti.

Agriculture Minister chuan, thlai chi hrang hrang state páwn aṭanga lak luh a ṭul lohna atan ṭan lak a pawimawh thu sawiin, "Central budget kan ring a, kan insem diat diat ṭhin. Kan sum neihte state páwna a luang chhuak tam lutuk hi economy-ah kan ṭhan theih loh phah. Kan thar chhuah ni lo state dang aṭanga kan lak luhte'n min chenchilh chhung chuan economy-ah kan ṭhang thei lo ang," a ti a; thlaia intodelh theih nan sorkarin theihtawp a chhuah thu a sawi.

Thlaia intodelh theihna turin taimakna nen ngaihtuahna sên a ngaih thu sawiin Minister chuan, "Rinawmna kan tlachham em em a, rinawmna nen ke pên a ngai. PMKMY-ah hian party thliar bik an awm dawn lo a, party sawi theih a ni lo. Eng party mi leh sa pawhin an hman ṭangkai tur a ni. Thingtlanga kut hnathawktute'n an hman ṭangkai ngei ka beisei," a ti. 

Agriculture director Romingthanga Colney sawi danin, PMKMY hi sorkar laipuiin India rama lo neitute ram hectare 2 aia zau neite an upat a, kut hnathawha eizawn an harsat huna pension an neih theihna tura duan a ni. Scheme hnuaiah hian lo neitu mumal taka inziah luh dan tur ang thlapa inziak lutte chuan kum 60 an tlin hunah thla tih Rs. 3,000 an la thei dawn a; lo neitu kum 18 aṭanga 40 inkar tan inziah luh theih a ni.

Scheme-a inziak lut duhte chu an awmna aṭanga common service centre (CSC) hnai berah Aadhaar card leh bank passbook kengin an inziak lut thei a, sum sen a ngai lo. PMKMY hnuaia inziak lutte chuan thla tin sum an thawh ve ang a, an thawh zat ang chiah sorkarin a thawh ve dawn a ni. Lo neitu chu kum 60 a tlin hmaa a thih chuan a nupui/pasalin kum 60 a tlinin a dawng chhunzawm thei ang. Nupaa inziak lut tan erawh dawn theih a ni lo.

.    Sorkar laipui scheme National Pension Scheme, Employees State Insurance Corporation Scheme, Employees Fund Organisation Scheme etc.-a telte

.    Pradhan Mantri Shram Yogi Maan Dhan Yojana thlangtute

.    Pradhan Mantri Laghu Vyapari Mandhan Yojana thlangtute

.    MLA, MP, mayor, chairperson leh district panchayat ni tawhte

.    Sorkar hnathawk mek leh pension tawhte

.    Income tax pe chinte

.    Doctor, engineer, lawyer, chartered accountant, architect