KHAWTHLIR

UPC (NEI) Thenzawl Pastor Bial chuan nimin khan Serchhip District Hospital tan Thenzawl­ah thisen unit 34 an pe a, a petute mipa 23 leh hmeichhia 11 an ni. Kola­sib Bial ṬKP pawhin an silver jubilee pualin BCM Kolasib Kohhran Hall-ah blood donation camp an huaihawt a, mipa 15 leh hmeichhia pahnihte'n thisen unit 17 an pe. Nimin Vanglaini-a thisen pek tarlanah, Pentecostal Youth Fellowship tih chu Pentecostal Youth Department (PYD), UPC NEI zawk an ni. 

Food, Civil Supplies and Consumer Affairs (FCSCA) department chuan thuchhuah siamin, dan loa gas (LPG) zuar leh hralh (black marketing) man chhuah an awm chuan, The Mizoram Trade Articles (Licensing and Control) Order 1987 anga hrem an nih tur thu an puang. FCSCA chuan, hun eng emaw ti aṭangin Aizawl khawpui leh Mizoram hmun hrang hrangah phalna awm lo leh dan bawhchhiaa LPG zawrh a awm tih hriat a nih thu leh, department-in a ngaih thu tak thu a tarlang.

Rashtriya Poshan Abhiyan (National Nutrition Mission) hnuaia Poshan Maah (Nutrition Month) hman mek pualin Aizawl Urban ICDS Project chuan nimin khan Anganwadi worker-te nen School Based Event Urban huam chhung hmun hrang hrangah hun an hmang a; kut sil fai, mahni in leh a chhehvel faina leh ei tur ṭha hrang hrangte zirho a ni.

Lawngtlai Town Sanitation Task Force chu nimin khan Lawngtlai DC conference hall-ah SDO (Sadar) Rochuangkimi Khenglawt hoin an ṭhu khawm a, Faina Hapta (Cleanliness Week) 2019 leh Swachhata Hi Seva (Mass Cleaning of Plastic Waste) hman dan tur an rel. Meeting chuan kumin Faina Hapta hawnna hun chu October 2, 2019 zing dar 7-ah Lawngtlai Bazar Venga Areopagy hmunah hman ni se, an ti. Hawnna hun hman zawhah Lawngtlai khawpui chhunga sorkar official te, sikul naupang te, scouts & guides te, National Service Scheme (NSS) leh DAY-NULM hnuaia Self Help Group te'n faina kawng zawhin, khawlai dunga bawlh-hlawh then fai hnatlang an nei chhunzawm ang.