MNF party thil tih dan eptute'n an dem

Zoram Peoples' Movement (ZPM) chuan MNF party pisa, Mizo Hnam Rûn chu zirna pawngsual tumah an puh a; Mizoram Pradesh Congress Committee (MPCC) pawhin MNF sorkarin muster roll-a zirtirtu 881 lakna a kalpui dan chu mipui zah lohna a nih thu an tarlang.

Congress party chuan, Mizoram sorkarin MR-a zirtirtu 881 lakna a tihfel vek tawh chu MNF party chhungah lungawi lo tam tak an awm avangin result siamṭhat leh an tum tih sawiin, "MNF sorkarin kalphung mumal a neih lohzia leh mipui zahna an neih lohzia a lang chiang hle a ni," an ti.

MPCC chuan, "Education department-a MR zirtirtu laknaah thil fel tâwk lo a awm nia sawia Pu Vanlalzawma, MNF treasurer-in result ennawn a nih tur thu Hnam Rûna a puang hian MNF-in Hnam Run aṭanga sorkar hna lakna control an chìnzia a tarlang a, Education Minister an rin tâwk lohzia leh an zahlohzia a lang chiang hle. Hnam Rûn aṭanga an puang chhuak chuan sorkar inrêlbàwlna kalphung an ngaih pawimawh lohzia a tichiang hle bawk," an ti a; ‘Thil fel tawk lo a awm’ an tih chu sawifiah turin MNF an phût.

MPSC kut aṭanga zirtirtu lak hna chhuhsak a, recruitment rules awm sa tidanglam a, dan siamchawp hmanga zirtirtu lak chu a ṭobul aṭangin a fuh tawh lo hrim hrim tih sawiin MPCC chuan, "Mizo ṭhalaite tana inelna thianghlim buatsaih duh lo a, MNF mi leh sa a tam thei ang ber sorkara thun tumna rilru avanga MPSC hna lak tur chhuhsak an nihzia a chiang zelah kan ngai," an ti.

Congress party hian MNF chu ṭhalai lehkhathiamte tibeidawng zawnga hma la lo turin an phût a; zirtirtu laknaa thil fel lo nia an hriatte mipui hriata puang chhuak tur leh, zirtirtu laknaa mark pek dan zawng zawng mipui hmuh theiha tlangzarh turin MNF sorkar an phût bawk.

ZPM thuchhuah chuan, MNF sorkarin MPSC thuneihna chhuhsak a, primary school leh middle school zirtirtu tur 881 lakna a kalpui dan chu party induhsakna liau liaua an kalpui a hlauhzia a sawi tawh ṭhin tih a tarlang a, Education minister Lalchhandama Ralte hoa zirtirtu 881 lakna fel taka an kalpui chu lawmawm an tih thu an sawi.

ZPM chuan, Education Minister awm loh hlâna result tihchhuah, a awm loh lai veka siamṭhat a nih tur thu September 23-a MNF treasurer Vanlalzawma'n Hnam Rûn-a a puang chu mak an tih thu an sawi a, "Education Minister ber hriat loha hetianga thil tih a nih chuan Mizoram education hi nasa taka pawngsual a ni leh ngei dawnin kan ngai," an ti.

Hetih lai hian, BJP, Mizoram chuan, zirtirtu lakah dik taka tih a nih a, party bil duhsakna a awm loh tur thu a sawi tawh ṭhin anga Education Minister-in hma a la ngam chu fakawm an tih thu leh an chhuan thu an tarlang. "Eng hna pawh, a thiam leh tling ngei lak zel hi BJP Mizoram chuan kan tum dan leh hmathlir a ni a, party bil sorkar ni lo, mipui sorkar dik tak din hi kan duhthusam a ni," an ti a, zirnaah phei chuan party politics inrawlh lo leh zual se an duh thu an sawi.