CM hoin board pahnih ṭhu khawm

Mizoram sorkar hnuaia Bamboo Link Road Board chu nimin khan CMO Conference Hall-ah an ṭhu a, chairman Zoramthanga, chief minister-in a kaihruai. Chief Minister ho hian September 23, Thawhṭanni khan CMO-ah vêk Horticulture Development Board an ṭhu khawm bawk.

Bamboo Link Road Board meeting-ah Chief Minister chuan, rua hmanga state economy tihhmasawnna atan link road a pawimawh thu sawiin, Board chuan hna hautak tak, beihpui a beih ngai thil a nih thu a sawi a; Board member-te chu bamboo link road siam­na tur hmun remchang leh siam a ṭulna hmunte a chíngtu turte nen inráwn chunga bawhzui turin a chah.

Meeting-ah hian Board hmalakna atana ṭul hrang hrang sawiho a ni a; Mizoram chu Bangladesh leh Myanmar rîtu a nih avangin rua leh rua aṭanga thil siamte chu hralh chhuahna lamah harsatna a awm loh tur thu sawi lan a ni.

Bamboo Link Road Board-ah hian MLA Ramthanmawia chu vice chairman a ni a, PWD secretary chu member secretary a ni. Meeting-ah hian Planning Board vice chairman H Rammawi, Board member secretary JC Ramthanga, Planning secretary Dr C Vanlalramsanga leh member dangte an tel.

Horticulture Development Board meeting-ah CM Zoramthanga chuan, Mizoram chu ei tura intodelhtir chu pawimawh hmasa ber a nih thu a sawi a; Board member-te chu Horticulture-in a huam chin thlai leh theite hlâwk zawka thar chhuah a nih theih nan te, state danga thawn chhuah dan tur thlenga ngaihtuahna sêng turin a sáwm.

Zoramthanga chuan, mipui mamawh phuhrûk thei tur chuan tam tham taka thar chhuah a ngaih avang­in, mihring thâ chuaha innghat lo a, a theih chin chinah khawl hman leh privatization kalpui uar tum a nih thu a sawi bawk.

Horticulture Development Board-ah hian MLA Dr F Lalnunmawia chu vice chairman a ni a, Horticulture secretary JC Ramthanga chu secretary a ni.