NSS kum 50 tlin lawm a ni
National Service Scheme (NSS) chuan nimin khan Vanapa Hall-ah an kum 50-na, golden jubilee an lawm a, Sports & Youth Services minister Robert Romawia Royte-in hmanpuiin, NSS unit zinga thisen pe ṭha ber lawmman siam a nih dawn thu a puang.
Robert Romawia chuan, NSS volunteer-te'n khawtlang leh ram tan thil ṭha tak tak - thing phun, thisen pek, orphanage home tlawh, awareness hrang hrang vantlang tana buatsaih, kawngpui leh vantlang hmun pawimawh tihfaite an tih ṭhin avanga lawmawm a tih thu a sawi a; faina chungchangah mi dangte zirtirtu ni zel turin NSS volunteer-te a chah.
Sports & Youth Services Minister hian nakkum aṭangin college leh higher secondary school volunteer zinga thisen pe tam berte hnenah Sports Ministers' Trophy for Blood Donation pek an nih tur thu a puang a; NSS Cell, Mizoram Annual Report 2018-19 a tlangzarh nghal.
NSS hi September 24, 1969 (Mahatma Gandhi birth centenary kum)-ah din a ni a, a din tirhah chuan university leh state thlan bikah chauh hawn niin, student enrolment pawh 40,000 chauh an ni. A hnua university leh state hrang hrangah hawn belh zel a ni a, tunah chuan NSS enrolment chu India ram pumah mi nuai 34 an tling tawh.
Mizoramah chuan Pachhunga University College-ah kum 1972 khan NSS din a ni a, chumi hnuah college hrang hrangah din belh zel a ni. Kum 1996 aṭangin college-ah pre-university course a awm tawh lo a, higher secondary school (HSS) din a nih tâk avangin HSS-ah NSS din ṭan ve nghal a ni a; Mizoram pumah NSS unit awmna zirna-in (sikul, college & university) 86 a awm mek a ni.