Sorkar laipui scheme hnuaia hnate thlirho

Rural Development department hnuaia kalpui sorkar laipui scheme - Mahatma Gandhi Rural Employment Guarantee Scheme, Pradhan Mantri Awaas Yojana (Gramin), Border Area Development Programme (BADP), Mizoram State Rural Livelihood Mission, Social Audit Unit (SAU) leh Mission Antyodaya-a mid-term review meeting chu nimin khan RD minister Lalruatkima kaihhruai­in Aijal Club-ah neih a ni.

Minister Lalruatkima chuan, scheme hrang hranga project director leh block development officer-te chu mi rethei dâwm kânna leh ram hmasawnna atana thawktu an nih inhria a, an bial hre chiang tur te, ṭhahnemngai leh zuala thawk turtein a fuih a; scheme kalpui danah fel leh dik taka kalpui a ni em tih en zui uluk turin a chah.

Meeting-ah hian district leh RD block hrang hrangte'n thingtlang tihhmasawnna tur scheme hrang hrang an kalpui dan thlir a ni a; Mizorama khaw tin dinhmun hriat chianna turin Mission Antyodaya survey neih a ni dawn a, chumi chungchang chu meeting-ah hian sawi lan a ni bawk.

RD scheme kalpui ṭha district leh RD block-te hnenah award hlan a ni a; MGNREGA hnuaia hmalaknaah district bik­ah Aizawl district chu ti ṭha ber a ni a, Serchhip leh Kolasib district-te'n an dawt. Block-ah chuan Thingsulthliah pakhatna a ni a, Phullen leh Darlawn block ten an dawt a ni.

PMAY(G)-ah Serchhip district pakhatna a ni a, Aizawl district pahnihna niin, pathumna chu Kolasib leh Champhai district an ni. RD block-ah chuan East Lungdar Block pakhatna a ni a, Serchhip leh Thingsulthliah block-te chu pahnihna leh pathumna an ni.