MR zirtirtu lakah dik lo a awm em tih enfiah a ni dawn - Education Minister

Vanglaini palai zawhna chhangin School Education minister Lalchhandama Ralte chuan, MR zirtirtu lak chungchang chu Chief Minister nen an sawi dun tawh tih a sawi a, "Hetiang zat hna lak a nih avang hian thil dik tâwk lo a awm palh leh awm loh enfiah Chief Minister-in a duh a, party mi inthun tumna lam a ni lo," a ti.

School Education Minister sawi danin, zirtirtu lakna atan hian hna lak buaipui turin DPC (Departmental Promotion Committee) pakua din a ni a, DPC chu Aizawl district tan pathum, Lunglei district tan pahnih leh district dang zawng tan pakhat ṭheuh din a ni. Hna lak a tam avangin DPC pawh din tam a ni a, chu vang chuan, eng emaw dik lo a awm palh thei a ni. Dik lo a awm chuan siamṭhat a ni ang. Endik hna thawh a nih chhan ber tur chu, dik lo a awm em tih uluk zawka enfiah a ni a, duhsak zawngte thun lam a kâwk lo.

A khaw mi leh a khaw bul hnaia mi diltu an awm laia hmun danga mi lak an awm nia sawi chungchangah Lalchhamdama Ralte chuan, "Department hotute ka ko tawh a, hetiang a awm theihna chhan, a khaw mi emaw, khaw bul hnaia mite aia mark an hmuh san theih dan chhui chiang turin ka hriattir tawh," a ti.

Tarlan tawh angin, MR-a thawk tur zirtirtu 881 laknaa tlingte hming chu September 20, 2019 khan School Education department website-ah tih­chhuah a ni a, appointment order erawh pek a la ni lo. MNF treasurer Vanlalzawma chuan September 23 khan Mizo Hnam Rûna thu a sawi­naah, Chief Minister nen an inbiaknaah, 'Zirtirtu MR lak result tihchhuah chungchangah, School Education Minister chu phai lama a zin a lo haw mek a, a lo haw hunah thil fel tâwk lo leh siamṭhat ngai chu a ṭul angin hma kan la ang,' tiin a puang a ni.