Raw supply an tum dan hi mimal sum siamna mai a ni - Zodintluanga

Congress Legislature Party (CLP) leader Zodintluanga, Congress party treasurer ni bawk chuan, MNF sorkar chu an sorkar tûk lawk aṭanga mi chaw béla awm sa chhuhsaktu an nih avangin 'Ni ṭha loa roreltu' an nih thu a sawi a; raw supply an tum dan chu mimal sum siamna mai a nih thu a sawi bawk.

Siaha Congress Bhavan-a nimina Mara DCC Conference cum General Election 2019 a hmanpuinaah thu sawiin Zodintluanga chuan, sorkar thar hmalakna hmasa ber chu îtsîkna a nih thu a sawi a, "Ni ṭha loa roreltu an nih lanna chu, an sorkar tirh phat khan an rorel hmasak berah îtsîkna, mite tâ chhuhsak pawisak lohnain an ṭan a ni. Sorkar hmasa contract hna an pek work order an kawl vek tawhte pending sakin an chhuhsak a, mi thlènga mi an va awt ngawih ngawih hi a zahthlak a ni," a ti.

Autonomous district council (ADC) pathum - Lai ADC, Mara ADC leh Chakma ADC-te state sorkarah Congress-in rorelna a chan lai chuan thlamuang takin rorel a ni a, buaina a awm ngai lo nia sawiin Zodintluanga chuan, "Tunah MNF-in thla sarih/riat chauh an rorel laiin tun hmaa an zia pholang lehin, ADC pathumte an tibuai vek a, a thlang tlingtu mipui an chîâi zo a ni," a ti a; CADC an tibuai vek a, LADC tibuaiin Court-ah an inkhing a, MADC pawh ṭhiahah an vau tih a sawi.

MPCC Treasurer chuan, chief minister Zoramthanga'n BJP a hlauh êm avangin CMO tualah RSS za rualin Vande Maataram an sak khum ngam tih sawiin, "Assam minister pakhat Himanta Biswa Sharma a tlawn a, kar hnih Delhi-ah kalin, a rawn haw ngáwi dák a ni," a ti a; Mizoram CM chu BJP laka zawr hneh hle-ah a puh.

MNF flagship prog­ramme chu an hotu lú ber aṭangin an ṭhelh a, sum siamna atan mai an hmang dawn nia a lan thu sawiin Zodintluanga chuan, "Léngte ramah raw chi an chíng ṭeuh a, hei hian mau leh rua hi sum siam nan mai mai a buaipui tih a chiang a ni mai lo'm ni?" a ti.

CLP Leader chuan, CM Zoramthanga'n, raw chìn a hlâwk dawn avang­in IAS-te pawhin an bàn phah duh tur thu te, Assembly House-ah raw chìn tur chu a supply-tu tur monu a dam loh vang­in an lo thawn theih rih loh thu leh nakin lawkah a chi tam tak an lo thawn dawn thute a sawi tih a sawi a; "CM-in House-a a sawi chu sor­kar thuchhuak a ni. Hetih lai hian, Hnam Rûna a thusawiah, sor­karin rua an buaipui dawn loh thu leh a buaipuitute hnen 

aṭangin supply a nih tur thu a sawi ta daih a. Leng­te ramah raw chi an chîng­ ṭeuh a, sum siam nan mai mai a buaipui tih hi a chiang a ni," a ti.