Mizoram sorkarin Secretariat-a officer-te Laptop/notebook/tablet a leisak dawn

Mizoram sorkara officer, under secretary chin chung lam zawng zawngte chu information technology (IT) lam hmanrua - laptop, notebook, tablet leh an anpui zinga eng emaw ber lei a phalsak a, a nihna san zawng azirin a man zat leh sum sen theih zat bithliah a ni.

General Administration Department (GAD)-in circular a chhuah danin, sorkara under secretary chin chung lam, laptop, notebook, tablet leh an tlukpui zingah hian officer chuan a duh ber a thlang thei a ni. Secretariat-a awm (post) mek officer-te chu laptop/notebook/tablet an leinaa sum senso sorkar aṭanga hmuh letna tur bill chu November 2019 ral hmain thehlut turin an inhriattir.

Officer-te dinhmun azira laptop, notebook, tablet leh a tlukpui an leina man, sorkar aṭanga an hmuh let theih dan chu - secretary leh a chung lamte tan Rs. 80,000 aia to lo, joint secretary - additional secretary-te tan Rs. 60,000 aia tam lo leh, under secretary - deputy secretary-te tan Rs. 40,000 aia sang lote a ni.

Officer-te tana laptop, notebook, tablet leh a tlukpui leina senso sorkara bill theih chungchangah hian GAD secretary B Lalthanliana chuan September 23, 2019 khan hriattirna (circular) a tichhuak a ni. Circular-ah hian, Secretariat chiah sawi lan a ni a, directorate lama officer-te sawi lan a awm lo.

Mizoram sorkara secretary-te department enkawl tur September 4, 2019-a tihchhuah ang chuan, Mizoram sorkarah chief secretary telin secretary mi 32 an awm mek a; secretary mi 32-te'n Rs. 80,000 man laptop/notebook/tablet lei ṭheuh ta se, Rs. 25,60,000 sen a ngai dawn tihna a ni.

Secretary hnuai lama officer, additional secretary, joint secretary, deputy secratary leh under secretary zat erawh hriat mai theih a ni lo a, an tana sum sen zat tur pawh hriat theih a ni lo. Chutih rualin, thu dawnna pakhat chuan, additional secretary, joint secretary, deputy secratary leh under secretary zat chu secretary zat let nga (5) aia tlem lo an nih a rinawm thu a sawi.

Secretary leh a chung lam    -    Rs. 80,000

Joint Secy - Addl Secy    -    Rs. 60,000

Under Secy - Dy Secy    -    Rs. 40,000

Mizoram sorkarah secretary 32 an awm mek.

Secretary mi 32 tan Rs. 25,60,000 sèn a ngai dawn.