Mizoram electoral roll aṭanga Rakhine-te paih turin CEO ngen

Joint NGO Coordina­tion Committee hruaitute chuan nimin khan chief electoral officer (CEO) Ashish Kundra a pisaah an kâwm a; Myanmar aṭanga Mizorama ráltlân Rakhine mi 489-te Mizoram electoral roll aṭanga paih turin an ngen.

Joint NGO chairman Van­lalruata, Central YMA president chuan, India Constitution kalh­in Rakhine mite chu Mizoram electoral roll-a thun an nih thu a sawi a; electoral roll ennawn neih leh hmasak berah paih leh ni se, tih chu Joint NGO-te duh dan a nih thu an thlen a ni.

Vanglainiin Joint NGO hruaitute hnen aṭang­a thu a dawn danin, Ra­khine mi 489, Mizoram electoral roll-a chuangte chu Mizoram leh Myanmar inrìna vel, Lawngtlai West constituency huam chhunga khaw pathuma chengte an ni.