KHAWTHLIR

Nimin khan Uganda ram khawpui, Kampala-ah 64th Commonwealth Parliamentary Conference ṭan a ni a, Mizoram aṭangin Assembly speaker Lalrinliana Sailo pawh a tel. Conference hi September 28, 2019 thleng awh tur a ni.

UPC (North East India) chuan nimin khan Missionary Day an hmang. UPC Missionary Day hi UPC kohhran tam zawk chuan awmní khamin ruai nen an lawm a; kohhran ṭhenkhat chuan zan lamah chauh an hmang thung. UPC NEI hian Mizoram chhung leh páwnah missionary 244 an ruai mek a, mission field pakhua - Assam, Dimapur, Upper Assam & East Arunachal, North Bengal & Sikkim, Bihar & Jharkhand, Odisha, Andaman and Nicobar Island, Arunachal Pradesh leh Bhutan-ahte an nei mek a ni.

Samagra Shiksha, Mizoram hnuaia special educator & resource person-te tan September 24, Thawhlehni aṭang khan Saron Indoor Stadium-ah training buatsaih a ni a, The right of Persons with Disabilities Act, 2016 (PRwD Act) chungchang zirho a ni. Training hi deputy state project director C Chawngthantluanga'n a kaihruai a, Mizoram puma SSA, RMSA hnuai­a rual­banlo tana sikula thawk mi 123 an tel a ni.

Lengpui Branch YMA chuan, an khaw ram chhung Lunghmul luiah sangha inthlah pun hun a nih dawn avangin October 1 aṭanga November 15, 2019 thlengin luia nungchate man an remti lo a, sangha fuan ven an khap. Lengpui Model Branch YMA pawhin kumin October 1 - November 15 chhung Dialdâwk lui leh Challuiahte nungcha man tura kal an khap bawk.

Kumin fûrpui laia Khawthlangtuipui lian tuar nasa zual chhung­kaw 200 hnenah Baptist Church of Mizoram hnuaia R&D department leh Transform Aid International-te chuan nimin khan ṭanpuina thilpek chi hrang hrang an hlân. Ṭanpuina hlante chu Tlabung, Serhuan, Kawrpuichhuah, Jarullobasora leh Tippereghat khuaa mite an ni a; chhungkaw pakhat hnen­ah buhfai, silpauline, dâl, tél leh thosilen an pe a ni.