Multi Level Car Parking-cum-Market & Multi Utility building lungphùm phúm

Deputy chief minister Tawnluia, UDPA department enkawltu chuan nimin khan Thakthing Veng, Aizawla Multi Level Car Parking-cum-Market & Multi Utility building sakna tur lungphùm a phúm.

Tawnluia chuan, lirthei dahna tam tawk lo chu Aizawla ni tina harsatna tawh a ni tih sawiin, harsatna tihziaawmna tur leh veng chhung mi mai ni lo, veng ṭhenawmte pawhin an hman ṭangkai theih tur building pakhata thil chi hrang hrang ruahman a ni chu lawmawm a tih thu a sawi a; UDPA department-a thawkte hmalakna a fak.

UDPA Minister chuan, lungphûm phûm a nih aṭanga sak zawh thlengin ṭha taka enpuia vilpui turin khawtlang hruaitute leh mipui a chah a, neitu rilru pûa enkawl tur leh a nihna tur ang taka ṭangkai taka hmang turin a chah bawk. Smart City Mission hnuaiah kawng hrang hrangin Aizawl thawm ṭhat hna kalpui a nih tur thu sawiin, "Hmun pawimawh zuala CCTV dah te, mipuite'n awlsam zawka sorkar an dâwr theihna tur common service centre leh hmun hrang hrangah wifi hotspot dahte a ni ang," a ti.

Multi Level Car Parking-cum-Market & Multi Utility building sakna atan hian cheng nuai 884.73 ruahman niin, thla 24 chhung­a sak zawh tura ruahman a ni a, R Lian­tluanga,­ Bungkawn, Aizawl chu contractor a ni. Building chu Mizo chhiara chhâwng sarih tur a ni a, lirthei LMV 30 leh two-wheeler 30 dahna tur parking floor pathum siam a ni dawn a; thil dang eng emaw zat a awm dawn bawk.