DDU-GKY zir zote chawimawina leh thlahna

Mission Foundation Movement (MFM) chuan nimin khan Dawrpui Multipurpose Hall-ah thingtlang ṭhalai harsa leh chanhaite thiam thil zirtira eizawnna kawng kawhhmuhna, Deen Dayal Upadhaya Grameen Kaushalya Yojana (DDU-GKY) hnuaia zir zo ṭhalai 87 chawimawina hun an buatsaih a; Rural Development minister Lalruatkima'n a hmanpui.

Lalruatkima chuan, DDU-GKY course zir zo tawh ṭhalaite chu an hna ṭheuh hlut thiam tur leh mite awh tlaka an hnaah tui taka thawk tur­in a chah a; DDU-GKY chu RD department-in Mizoram State Rural Livelihood Mission (MzSRLM) kaltlanga thingtlang ṭhalaite thiamna bik neihtir a, eizawnna tur kawng buatsaihsak tura hmalakna a ni tih a sawi.

RD Minister chuan, sorkarin ṭhalai thiamna nei, eizawnna kawnga bul ṭan ngaihna hre lote ṭanpui a ngai pawimawh tih sawiin, "Ṭhalaite tana khawvel thar siam hi SEDP tum bulpui ber pakhat a ni a, SEDP hnuaiah Human Resource Development Board pawh din a ni," a ti.

DDU-GKY hi Ministry of Rural Development hnuaia skill development programme a ni a, Mizoramah chuan MzSRLM-in a enkawl. State Project Approval Committee-in Mizorama PIA atan Mission Foundation Movement an thlang a, MFM hnenah hian kum thum chhung atan target 400 pek a ni. MFM chuan healthcare sector thlangin general duty assistant (GDA) course an kalpui a ni.

Sorkar thuchhuah tarlan dan­in, scheme hnuaiah hian ṭhalai mipa leh hmeichhia, thingtlang mi, eizawnna mumal nei lote'n din chhuahpui tlak thiamna bik an neih theihna turin training kalpui tur a ni a, placement pawh 70% tal tling phâk tura beisei a ni.

DDU-GKY course zirna hi Berawtlang, Zemabawkah kalpui a ni a, batch hmasa ber­ah district hrang hrang aṭangin BDO-te kaihhruaina hnuaiah mi 96 lak an ni a, mi 86-in an zir chhuak. Training-te chu an zir zawh hmain campus placement interview neihpui an ni a, mi 86 zinga 31 chuan hna thawh tur an hmu tawh a, chu'ngte chu ram danga thawk tur mi pali, India ram chhunga thawk tur mi 14 leh Mizoram chhunga thawk tur mi 13 an ni.