PUC-ah Community College hawng

School Education minister Lalchhandama Ralte chuan September 24, Thawhlehni tlai khan Pachhunga University College-ah UGC Community College a hawng.

Hawnna inkhawm hi PUC Seminar Hall-ah neih a ni a; Lal­chhandama Ralte chuan, thiamna (skill) hmang ṭangkai ram apiangin hma an sawn tih sawiin, "India pawhin development-ah hma a sawn zel a, skill centre ni turin a inbuatsaih mek a ni. PUC-a skill development course chi hrang hrang buatsaih tur hian min tihlim hle a, course hrang hrang kalpui zel turin sorkar a inhawng hle a ni," a ti.

Course coordinator Dr Vanramliana chuan, Community College kalpui dan tur sawifiahin, zirlaite hnena thiamna bik (skill) pek chu an tum ber a nih thu a sawi. Certificate course hrang hrang - Mizo traditional handicraft, vermicompost technology, house keeping, repair & maintenance of power supply, inverter & UPS-te zir theih a nih thu te, thla khatah stipend Rs. 1,000 hmuh theih a nih thute a sawi bawk.

PUC principal Dr Tawnenga chuan, PUC-ah zirtirtu 130, non-teaching staff 100 vel, regular staff 104 leh zirlai 2,500 vel an awm mek tih a sawi.