Mizoram sorkarin MSSSB a la din lo
Mizoram sorkar chuan group B (non-gazetted) chin hnuai lam thawk tur latu atana din a tum Mizoram Subordinate Services Selection Board (MSSSB) chu a la din lo. Department of Personnel and Administrative Reforms (DPAR) hotute chuan, Cabinet meeting hmasa berah MSSSB Rules pharh hman an tum thu an sawi.
Vanglaini palai zawhna chhangin DPAR hotute chuan, MSSSB din a la nih loh thu an sawi a, "Rules buaipui mek a ni a, Finance leh Law & Judicial department lamah tihfel ngai neuh neuh a la awm. Cabinet an ṭhutkhawm hmasak berah rules pharh theih tura peih hman tum a ni. Rules peih a nih hnuah MSSSB hi din theih a ni ang," an ti.
DPAR hotute sawi danin, Rules hmangin MSSSB chairman leh member turte ruat tur a ni a, an dinhmun turte pawh Rules-ah dah vek a ni ang. Rules peih a la nih loh avangin chairman leh member tur ruat an la ni lo a, chairman leh member bakah, post dang siamte pawh a ngai dawn a ni.
DPAR hotute chuan, tun dinhmunah chuan MSSSB khawih tur hna nghet lak tur a awm mai loh thu an sawi a, "Tuna MPSC-in MSSSB khawih tur ang chin an khawih mek pawh hi sorkar hmasain hnaruak hnawhkhahna atana lak tur a tihte a ni. MSSSB hi din ni mah se, hna lak tur an nei nghal kher lo thei. Promotion chungchang erawh khawih tur an nei nghalin a rinawm," an ti.
Tarlan tawh ṭhin angin, June 10, 2019-a Council of Ministers meeting chuan, MPSC-in Mizoram sorkara thawk tur lakna a khawih ṭhin zinga group B (non-gazetted) chin chu MPSC-in khawih tawh lo turin thutlukna an siam a, group-B (non-gazetted) chin hnuai lam hna thawk tur lakna buaipui turin MSSSB din an tum a ni.
Sorkar thuchhuah tarlan dan chuan, MPSC kaltlanga hna lak tam lutuk chhâwk zângkhaina atan leh an hna lak leh thawh turte a hun tak zela an lak theihna atan group-B (non-gazetted) recruitment chu MPSC mawhphurhna aṭanga lak chhuah Cabinet chuan an rel a ni.
Hetih lai hian, DPAR (GSW) chuan September 20, 2019 khan MSSSB hnuaia thawk turte lakna atan notification a chhuah a, chutah chuan post tina mite hlawh zat tur pawh tarlan a ni. Table-a mi hi MSSSB-a thawk tur lakna atana notification chhuaha tarlan dan a ni.