Dy.CM-in Zodin car parking sak a enfiah

Deputy chief minister Tawnluia, UDPA department enkawltu chuan nimin khan Zodin Multi Level Car Parking cum Utility Centre sak mek a hmunah a enfiah. MLA pahnih - C Lalmuanpuia leh Zothantluanga ten an ṭawiawm.

Dy. Chief Minister hian building sak hna thawktute a kâwm a, hmalak chhunzawn dan turte a sawipui. Tawn­luia chuan, Aizawl khawpuiah parking indaih loh vangin kawngpui leh khawpui a tâwt hle tih sawiin, "Kawng dunga motor dah vangte hian motor chêt vel a harsain traffic jam vangin harsatna a nasa ṭhin hle a ni," a ti.

UDPA Minister chuan, khawpui tâwt leh traffic jam-te tihziaawm a nih theih nan sorkarin motor dahna tur hmun remchang laiah siam ni se, tiin ruahmanna a siam thu sawiin, "Zodin Cinema Hall awmna ram hi sorkarin leiin, multi level car parking ṭha tak siam tura hmalak a ni ta a; mipui tana ṭangkai tur zawka sorkarin a ngaih avangin car parking chauh ni loin, utility centre dah tel bawk ni se tiin ruahmanna siam a ni," a ti a; a sakna atan cheng nuai 2,500 ruahman a nih thu a sawi.

Zodin Multi Level Car Parking cum Utility Centre sakna tur hian October 12, 2017-ah sanction hmuh a ni a, design siamtu chu JMT Architect an ni. Chhawng riata sang tur a ni a, lirthei 100 dah theihna tura ruahman a ni.