KHAWTHLIR

Bangalore-a Sheraton Hotel-ah September 25, Nilaini khan Water Future Conference hman a ni a, Mizoram Lok Sabha MP C Lalrosanga'n a hmanpui. Integrated Mountain Initiative (IMI) buatsaih confe­rence-ah hian Himalaya bulṭhut state pakua leh a chhehvela tui hum­halh leh hman ṭangkai chungchangte sawiho a ni a; India hmarchhak MP-te leh MLA-te an tel a, IMI member Dr Lalbiakmawia Ngente leh Prof. Lalnuntluanga te an tel bawk.

NEHU-a Centre for Professional Deve­lopment of Teacher Educators leh Institute of Advanced Studies in Education (IASE) chuan nimin khan 'Faculty development programme on Asses­sing the Education Policy Environment: Implications for Pre-Service and In-Service Teachers’ an buatsaih a, Aizawl DC Vanlalngaihsaka'n hawnna inkhawm a hmanpui. Hawnna hi IASE principal Prof. Vanlalhruaii'n a kaihruai a, district tina DIET, MZU, SCERT, MBSE, MHTC, IASE leh School Education department aṭangin aiawh an tel a ni.

Zawlnuam College chuan ICSSR, NERC Shillong bultumin nimin khan an college-ah 'Ethnicity, culture and identity in Northeast India' tih thupui hmang­in national seminar an buatsaih. Seminar hi Mizoram University-a professor Jangkhongam Doungel chuan a hmanpui a, Mizoram, Assam, Tripura leh Manipur aṭangin scholars hrang hrangte'n paper an buatsaih an sawi a ni. Zawlnuam College hi kum 1986-a din, kum 2007-a sorkarin a lak a ni a, NAAC accreditation-ah grade 'C' a ni mek.

Vawmbûk khuaa LADC Rest House sak thar chu nimin khan LADC chief executive member T Zakunga'n a hawng. LADC CEM chuan, autonomous district council nei tlak an ni tih kawng hrang hranga lantir a ṭul thu a sawi a, "Pathian malsawmna dawng tur chuan kan thinlung hi Pathian lama kan hawn a ngai a ni," a ti. Rest House hi cheng nuai 30 sênga sak a ni.