IPR officer leh MJA-te'n Parliament an zir

Information & Public Rela­tions (IPR) department officer panga leh Mizoram Journalists Association (MJA) member 15-te chuan September 25, Nilaini khan Parliament-ah training ṭanin, nimin khan an nei leh a, vawiinah pawh chhunzawm lehin an zo nghal ang.

Mizoram media team hian Parliamentary Research and Training Institute for Demo­cracies (PRIDE), Lok Sabha-ah 'Parliamentary Practices and Procedures' tih thupui hmangin training an nei a, Nilainia training hawnna chu Lok Sabha joint secretary Rimjhim Prasad hoin hman a ni.

Rimjhim Prasad-i chuan, democracy chu mipui tana din a ni tih sawiin, "India ramah mi maktaduai tam tak an awm a, chu'ng mite tana rorelsak chu Parliament thil tih langsar ber a ni. Sorkar hmalakna mipui hnena puangzartu media-te hi sorkar hmalakna puitu ṭha tak an ni a, chu chu sorkarin a hriat avangin hetiang zirhona hi buatsaih ṭhin a ni," a ti a; thuthar thehdarhtute'n Parliament House-a rorel dan an puanzarnaah Parliament kalphung an hriat chian a ngaih thu sawiin, an training chuan an hnathawhnaah nasa taka a puih tur thu a sawi. 

Lok Sabha Research and Training director Alpana Tripathi pawhin, tuna an training ang chu journalist-te tan an buatsaih ṭhin bakah, central service officer hrang hrangte kum tin training an pek thin thu a sawi a, "Journalist-te hi ram rorel dan mipui hrilhtu an nih avangin an tana training buatsaih hi kan ngai pawimawh hle a ni," a ti.

A ṭan ní-ah hian chawhma lamah Lok Sabha, Rajya Sabha leh Parliament Central Hall an tlawh a, chawhnuah lecture session ṭum hnih neiin, Parliament leh legislature-a dan siam dan kalphung an zir a ni. Training-a kalte hi IPR department aṭangin joint director Lalramliana Chawngte, deputy director K Vanlalsangi leh IPRO dang pathum - Malsawmsanga, Pratap Chhetri leh Dr Saithan­tluangi Zote te an ni.

MJA aṭangin mi 15 an tel a; chu'ngte chu Aizawl aṭangin general secretary Zohmingmawia (Aizawl Post), secretary Lal Rinmawia (Vanglaini) leh Lalnunzira Chawngthu (DDK) bakah member dang - Vanlalrema Vantawl (Zalen), Zodin Sanga (Newslink), F Lalliansanga (The Frontier Despatch), Samuel Lalruatsanga (ZONET) leh Henry Lalhlimum (Mizoram Post) an ni a, district dang aṭangin Lalhlupuia (Lenrual), C Lalhminghlua (Laisuih), Laltlanthanga (Hlimthla), Elvis Lalthangzuala (Rauthla), C Lallawmzuala (Vairengte Aw) leh C Lalramdinzela (Mamit Times)-te an ni.