Vanapa thlân awmna hmun sawifiah

Rabung Branch YMA-a Vanapa Thlan Sub-Committee chuan nimin khan Aizawl Press Club-ah thuthar thehdarhtute an kâwm a; Vanapa (Thangzachhinga, Chawngthu Vanchiau) thlàn chu Aiduzawl Rabung ram, Zàwlnghâkah ngei a awm niin an sawi a, thuhretu an sàwmte'n an sawifiah bawk.

Vanapa Thlan Sub-Committee secretary KC Lalchhandama sawi danin, Vanapa thlàn chu Zàwlnghâk rama Liankhama thlân bulah a awm a ni. Vanapa chêttlatna leh awm tawhna khuate chu - Zawngṭah, Kelsih, Hlimen, Aizawl, Dàrlawng, Lamtual, Saitual, Puilo, Vanchéng, Awnnu, Tualte, Lungdûp, Champhai, Kelkang, Dîltlang (Kanghmun), Lungfai, Tawngchin, Tualcheng, Bakawk, Tualbung, Vangte, Bualpui leh Zawlnghak-te a ni a; lal a hrawnte chu Lalsavunga, Vanhnuailiana leh Liankhama te an ni.

Vanapa Thlan Sub-Committee hruaitute chuan, Vanapa thlàn zawn hna chu Aiduzawl leh Rabung YMA ten January 9, 1992-ah an ṭan a, Vanapa thlàn leh Liankhama thlàn chu Aiduzawlah an hmu chhuak a ni. Art & Culture department hnenah thlenin, chutih laia Art & Culture joint director C Laitanga chuan a hmunah a enpui. May 25, 2004-ah sorkarin nemngheh tumin hma a la a, sawisel duhte tan hun a hawng a, Hnahlan lam aṭangin sawiselna a awm tâk avangin Zàwlnghâk chu nemngheh a la ni lo.

Thuhretu hrang hrang - Rodaii, Lalrinenga, K Lianvela, F Lalhnuna, Lalhmingliana Sailo, R Neihlaia leh Lalrengpuia Sailo te chuan Vanapa chu an pi leh pute'n thu hmanga an lo hlan chhàwn dan chuan, Zàwlnghak ramah ngei a lú a phúm niin an sawi a ni.

Vanapa Thlan Sub-Committe chairman Kawlchhawna Ralte chuan, Vanapa'n Zàwlnghakah a lu a phúm ngei tih thu dik hretu hrang hrang an awm a, chu'ng zingah chuan Vanapa hmuphaktu leh fate pawh an tel thu a sawi.

Kawlchhawna chuan, Zawl­nghakah bak Vanapa thlàn awmna hmun dang a awm lo tih sawiin, kum 2004-a sorkarin sawisel hun a siam sawiseltu an awm aṭangin sorkar lam aṭangin hmalakna a awm tawh loh thu a sawi a, "Tuna kan Art & Culture minister Pu R Lalzirliana hnenah kan sawi tawh a, ruahsur tlem hun hun remchangah Zawlnghak rama Vanapa thlan chu tlawha a hmuna en a tum thu min hrilh,'' a ti.

Rabung Welfare member PC Lal­hmingthanga, AMC mayor chuan, sorkar chu hnam rohlu leh pasalṭhate sûlhnû humhalh kawngah hma la chak lehzual thei se a duhthu a sawi a, "Kan ram leh hnam lo humhalh tawhtute Vanapa chauh ni lo, mi dang pawh an awmna leh lu nghahnate hre chhuak tura a zawn hna thawhnaah sorkarin sum dah se, Vanapa thlan inchuhna hi sorkar cho chhuaktu ni se," a ti a; Vanapa thlan nihna dik tak leh mipuite rilru damna turin DNA test thlenga hma la turin sorkar a duh thu a sawi bawk.