CAB chungchanga dâwihah sorkar puh

Congress party ṭhalaite chuan MNF kaihhruai Mizoram sorkar chu sorkar hnathawkte chunga vaupûng tina hle si, Citizenship (Amendment) Bill chungchanga dâwih hle si-ah an puh a, "Mizoramin lêlo sorkar kan hrawn hi a pawi kan ti," an ti.

Mizoram Pradesh Youth Congress Committee (MPYCC) chuan, tun hnaiah Health & Family Welfare department chuan thuchhuah siamin, sorkar hospital ṭhenkhat OPD hawn hun siam danglam a ni tih an tarlang a, "Order chhuah hnu rei lo têah tihdanglam leh nghal a ni. Thil awm dan zir chiang hmasa loa sorkarin thutlukna a siam hi ṭul loa theihtawp chhuahtu doctor leh thawktute thamlohnaah kan ngai," an ti a; Health minister Dr R Lalthangliana'n social media-a hero nih a tumnaah doctor-te thamlo takin hmanruaah a hmang ta maia an ngaih thu an sawi.

MPYCC chuan, MNF Serchhip unit-te'n thamlo takin, zawhna an chhàn loh chuan action lak a ni ang, ti ang záwngin déngkháwng takin Serchhipa doctor-te an vau nia sawi a awm tih an tarlang a;, "Ṭha lo kan ti a, MNF-te'n sorkar hnathawkte chunga inhrosak leh thamlo taka thil an tih ṭhinte sim nghal turin kan chah a ni. Sorkar hnathawkte laka vaupûng na hle si a, CAB dodalna kawnga tilreh ang maia Mizoram sorkar a ngawi dúk reng leh Zophai issue-a a dâwih aw dui reng mai hi a vanduaithlak hle a ni," an ti.