2018-19 chhungin rualbanlo mi 76 hnenah Puanṭhui khawl leh suma puihna pek a ni

Nimin khan Directorate of Economics & Statistics conference hall-ah 'Early identification & intervention of childhood disabilities in North Eastern states’ tih thupui hmangin ni hnih awh tur seminar buatsaih ṭan a ni. Seminar hawngtu, Social Welfare minister Dr K Beichhua chuan, kum 2018-19 chhungin rualbanlo mi 76 hnenah puanṭhui khawl leh suma puihna pek a nih thu a sawi.

Social Welfare Minister chuan, seminar chuan Mizo­rama rualbanlo enkawl­na kawngah hmasawn­na a thlen ngei a beisei thu a sawi a, "Hmun hrang hrang aṭanga rualbanlo enkawlna kawnga mithiamte leh tawnhriat ngah tak takte zirtirna kan nei tur hi ṭangkai taka hman ṭheuh i tum ang u," tiin kal khawmte a chah.

Seminar-ah hian Zoram Medical College, Health & Medical Education, Civil Hospital (Aizawl), RIPANS, SCERT, NILD-RC Aizawl, NPPCD, Samaritan Association for the Blind, Blind Society, Gilead Special school, Shining Star School-te aṭangin an tel a ni.