Kolasib-ah One Stop Centre hawng

Social Welfare department hnuaia Kolasib Vengthara One Stop Centre sak thar chu nimin khan district bawrhsap Zoengsanga’n a hawng. Centre hi kawng hrang hranga harsatna tâwk hmeichhiate tlûk luhna tura ruahman a ni.

One Stop Centre hi pasalte kut tuar hmeichhia, in aṭanga hnawhchhuah emaw, himna leh ṭanpuina emaw zawngte'n an pan theih tura ruahman a ni a, mi pakhat tan ni nga aia rei lo awm theihna tur a ni. Women helpline 181 kaltlangin dâwr/râwn theih a ni bawk.

Kolasib-a One Stop Centre hi Ministry of Women and Child Development bultuma cheng nuai 38 sênga Lalbiakengi’n a sak a ni a; khum panga, counseling room, office leh choka a awm. Thawktu centre administrator, counsellor, case master, paramedical staff-te awmin, an vaiin mi pakua an ni.

Zoengsanga chuan, Kristian ramah One Stop Centre mamawhna a sang ta hle chuan a ngaituahna a tikal thui hle tih sawiin, "Kum 100 chuang Chanchinṭhain min chênchilh hnua kan ram dinhmun hi a lungawithlak em tih inzawh nawn fo a ngai. Hmasawn zelnaah thil ṭha lo zawngin kan tuihâl a, sualna chi hrang hrangin Mizo society-ah bu a khuar nasa. Pathianni Kristian chauh ni loin, kan hnathawhna hmun leh kan ni tin nunah Pathian thu hi a taka kan nunpui a ngai a, chhungkaw tin aṭanga bul ṭan a ngai a ni," a ti.