Joint NGO-ten Union Home Minister lakah Lungawi lohna lantir an rel
Union Home Minister Amit Shah chu October ni 5, 2019 hian Aizawlah a lo kal dawn. Joint NGO hruaitute nimina thukhawm chuan Amit Shah lo thlen hunah lungawi lohna lantir an rel. BJP president ni bawk Amit Shah lo kal chhan Mizoram sorkarin a hriat dan leh North East Democratic Alliance (NEDA) convener Himanta Biswa Sarma sawi dan a inang lo.
Amit Shah-a lo zin tur chungchanga Mizoram sorkara GAD hnuaia Protocol Wing-te'n an hriat dan chuan exhibition hawng turin a ni a; Himanta Biswa Sarma erawh chuan, Amit Shah chu Citizenship Amendment Bill (CAB) sawi turin Mizoram a tlawh dawn tih a sawi thung.
Vanglaini palai zawhna chhangin Protocol Wing hotute chuan, report an dawn danin, Amit Shah chuan October 5-ah Mizo High School Field-a North East Handloom Exhibition hawng turin Mizoramah a rawn kal dawn tih an sawi a, "Ruahman dan chuan, zing dar 9:30-ah exhibition a hawng dawn a ni. CAB chungchangah engmah report kan dawng lo a, hriat kan nei lo," an ti.
Aizawla Amit Shah lo zin tur thu leh CAB chungchang sawi a tum thu hi Himanta Biswa Sarma chuan September 23, 2019 khan Silchar-ah a sawi niin Northeast Now chuan a tarlang. Mizoram BJP president Prof. JV Hluna chuan, Amit Shah lo zin tur thu chu hriattir an nih tawh thu leh a programme erawh hriattir an nih loh thu Vanglaini palai zawhna chhangin a lo sawi tawh a; nimina Vanglaini palaiin a biaknaah pawh JV Hluna chuan, Amit Shah-a'n eng nge Mizoramah a rawn tih dawn hriattir an la nih loh thu a sawi bawk.
Mizoram BJP President sawi danin, Amit Shah a lo zin dawn avang hian a rawn zin hma October 4-ah Himanta Biswa Sarma chu Mizoramah a rawn kal dawn a ni. Hetih lai hian, nimina NGO Coordination Committee (Central YMA, MUP, MHIP, MZP, MSU) ṭhukhawm chuan, Amit Shah-a lo zin hunah CAB an duh lohzia lantir nan lungawi lohna lantir an rél a; an hmalakna tur chu thlâwp turin Mizo zawng zawng an sáwm a ni.
Joint NGO chuan, "Union Home Minister leh BJP National President ni bawkin October 5, 2019-a Mizoram a rawn tlawh turah hian, Citizenship Amendment Bill, sorkar laipuiin tharthawh leh a tum kan duh lohzia lantir nan, a lo kalna tur Aizawl khawpui kawng dungah Mizo mipuite'n pawndum bâtin CAB duh lohna thuziak keng chungin, lo din ni se," an ti.