Dr C Sawmliana'n CSIR Award a dawng

Council of Scientific and Industrial Research (CSIR)-a senior principal scientist ni mek Dr C Sawmliana leh a thawhpui dang pahnihte chuan CSIR Technology Award - 2019 an dawng.

Award hi CSIR Foundation Day, September 26 khan New Delhi-a Vigyan Bhavan-ah hlan a ni a; Dr C Sawmliana leh a thawhpuite hian President Ramnath Kovind hnen aṭangin award an dawng a, award hian Rs. 2,00,000, thuchei leh nomawi a keng a ni.

Vanglaini palai zawhna chhangin Dr C Sawmliana chuan, India ram hmun hrang hranga thil laih chhuahna hmun hrang hrangah leh Navi Mumbai International Airport sakna turah hlawhtling taka controlled blasting a tih theih vanga award dawng an nih thu a sawi.

Dr C Sawmliana hian Midum khâm, Durtlang Leitan khâm leh Mizoram hmun dangahte pawh controlled blasting hmangin kawngpui sialnaah a thiamna a lo hmang tawh ṭhin. ZONET Cable TV chuan Dr C Sawmliana hnenah award a lo hlan tawh a, Vanglaini buatsaih Mizo Award dawng thei tura thlan chhuah zingah pawh a lo tel tawh a ni.