Chief Minister hoin State Planning Board an ṭhukhawm
Mizoram State Planning Board chuan nimin khan an chairman Zoramthanga, chief minister hoin Chief Minister's Office (CMO) conference hall-ah an ṭhu a, thil pawimawh hrang hrang an rêl.
Meeting-ah hian, sorkarin August 8, 2019-a Planning Board a din thar hnua hmalak tawhte sawi a ni a, Planning & Programme Implementation department kaltlanga hna thawk department hrang hrang zinga pariat chu Board-in an kawm tawh thu sawi lan a ni.
Project kal lai zingah chhan hrang hrang vanga a hun taka thawh zawh loh (delayed project) tam lutuk chuan project thar dil kawngah harsatna a siam ṭhin thu sawi niin, meeting chuan, hmalak zelna turah delayed project a awm tawh loh nan leh uluk zawka thawh a nih theih nan invil kawnga hma la turin thutlukna a siam.
Meeting chuan, monitoring & vigilance lama hma la tur committee din an rél a; committee chuan department hrang hrang hmalakna, an tum inang reng si, project hrang daiha hna thawh (duplicity of works) awm theite a veng ang a, ṭul loa sum leh tha sen ral a veng thei dawnah an ngai a ni.
Planning Board-ah hian member pariat an awm a, nimina meeting-ah hian vice chairman H Rammawi, Planning secretary Dr C Vanlalramsanga, Finance secretary Vanlal Chhuanga leh non-official member Liansuama, Lalthansanga, MFAS (Rtd.) leh N Zokunga, MCS (Rtd.) te an tel a ni.