KHAWTHLIR

Mizoram Lok Sabha MP C Lalrosanga chu September 26, Ningani khan member a nihna, Parliamentary Standing Committee on Coal and Steel meeting, Parliament House Annexe-a neihah a tel. Committee chairman Rakesh Singh kaihhruai meeting-ah hian kum 2019-20 chhunga an hmalak dan tur tlangpui sawiho a ni.

African Swine Fever (ASF)-in Mizoram ṭhenawm ram Myanmar a thlen tawh avangin, Mizoramah ASF a luh lohna tura inven nana vawk leh vawksa aṭanga thil siam chhuah reng reng state páwn aṭanga lak luh khapna hman mek chu zâwm turin AH&Vety department chuan mi tin an ngen. AH&Vety tarlan danin, Myanmar ramah ASF avangin vawk nuai 50 vel a thi tawh a; Mizoram sorkar chuan state pawn aṭanga vawk lak luh khapna thupek September 19, 2019-ah a tichhuak tawh a ni.

Central YMA hnuaia SRS, Kolasib Sub-Headquarters YMA leh Excise & Narcotics department-te chuan Ningani zan khan Kolasib-a ruihhlo zuar kumhlun leh a bupui bera an sawi Lalsangzuali d/o Siamliana (L) (46), Khuangpuilam, Kolasib inah heroin gram 21.28 (Bhaga cap 600) an mansak. SRS-te chuan, Lalsangzuali hi vawi tam tak man a ni tawh tih an tarlang.

TATA Trust NEIDA-in kumin fûr ruahtui tam vanga Lunglei district-a chhiat tâwk chhungkuate ṭanpuina an buatsaih chu nimin khan Lunglei DC Conference Hall-ah District Disaster Management Authority huaihawtin sem a ni a, bawrhsap K Lalrinzuali'n a hmanpui. In luah tlak loha chhia chhungkaw 22 hnenah tui tihthianghlimna, silpauline, buhfai leh rângva pek a ni a, lei khi leh min avanga in chhia chhungkaw 13 hnenah filter, silpauline leh buhfai pek a ni. Tlabung YMA hnenah life jacket 10 pek a ni bawk.

Mizoram University-a Department of Information Technology chuan nimin khan MZU-ah ni nga awh tur AICTE Training and Learning (ATAL) workshop an buatsaih ṭan a, India ram chhung hmun hrang hrang aṭangin mi 50 chuang an tel. IIT Kharagpur-a professor Prof. Sudip Misra chuan nimin khan thu a sawi a, workshop neih chhungin mithiam hrang hrangin thu an sawi dawn a ni.