Aizawlah World Day of Deaf hman a ni

National Health Mission (NHM) hnuaia National Programme for Prevention and Control of Deafness (NPPCD) bultumin nimin khan Taxation department auditorium-ah World Day of Deaf (Bengngawngte Ni) hman a ni a, Health secretary H Lalengmawia leh MJA president Zonunsanga Khiangte ten an hmanpui.

Inkhawm hi NHM director Dr Eric Zomawia'n a kaihruai a; H Lalengmawia chuan, bengngawng­te puala ni khat mai ni lo, chawlh­kar khat chhung khawvel puma hun hman tura duan a ni chuan khawvelin bengngawngte a ngaih pawi­mawhzia a tihlan thu sawiin, "Ri hriat­na lama harsatna tawkte duat takin enkawl ila, fin­chhuah an ngaihnaah i finchhuah ang u," a ti.

Health Secretary chuan, Health department-a thawktu indaih lohna chinfel tuma hmalak mek a nih thu sawiin, "Hna ruak 734 hnawhkhat tura hmalak mek a ni a, thla hnih/thum hnuah tihfel hman beisei a ni. Hna thar kan lak avangin duh thâla indaihin kan insemrual thei ang kan ti lo," a ti a, mi 734 lak thar an nih chuan indaih loh lutuk zualpui phuhruk theih an inbeisei thu a sawi.

MJA president Zonunsanga Khiangte chuan, bengngawngte chu dam ṭha pangngai nena khaikhin chuan, an khawsak a nuam lo hlein a rinawm tih a sawi a, "Bengngawngte'n nuam zawka hun an hman theih nan leh anmahni biak theih nan mi náwlpui hian sign language zir ila a duhawm. Betu an tam chuan mipui zinga awm nuam an ti sawtin a rinawm," a ti.

Inkhawma an sawi danin, khawvel pumah beng ṭha lo mi nuai 4600 vel an awm mek a, Mizoramah chuan mi 4,000 vel an awma chhût a ni. Mithiamte chuan hriatna ṭha lo hi enkawl hma chuan a dam theih thu an sawi.