SDRF-ah cheng nuai 9.7 a awm mek
Mizoram State Disaster Management Authority (SDMA) chu chief minister Zoramthanga hoin September 26, Ningani khan Chief Minister’s Office (CMO) conference hall-ah an ṭhu a; State Disaster Response Fund (SDRF)-ah sum nuai 9.7 a awm mek thu an tarlang.
Meeting-ah hian agenda 12 chhawp chhuah a ni a, Disaster Management Act, 2005-in a sawi danin, SDMA chu zalenna leh thuneihna zau zawk neia chhiatrupna thlena inpuahchahna tur policy te, chhiatna thleng thei hrang hrang pumpelh theih dan tur te inven dan tur duan lâwk chungchang te, SDMA tichak tura thawktu lak belh dan turte sawiho a ni.
Chhiatna a thlena rang zawka sum mamawh hman nghal tur a awm theih nan leh chhiat tâwk te rang zawka ṭanpui dan tur te, State Emergency Operation Centre leh Institute of Disaster Management dinna tur hmunhma chungchang te, National Disaster Management Authority duh dan anga SDMA hminga bank-a account hran hawn te, YMA branch-te ṭangkai zawk theih nan chhanchhuahna hmanrua pek dan tur te, district thar pathum - Hnahthial, Khawzawl leh Saituala SDRF dah chungchangte an ngaihtuah bawk.
SDMA hi kum 2006-ah din a ni a, tunah hian CM Zoramthanga chu chairman niin, deputy CM Tawnluia chu vice chairman a ni. Chief secretary Lalnunmawia chu member secretary leh chief executive officer a ni bawk. Nimina SDMA meeting-ah hian Home minister Lalchamliana, Power & Electricity minister R Lalzirliana, Supply minister K Lalrinliana leh EFCC minister TJ Lalnuntluanga te leh member dangte an tel a ni.