Thiam loh chang kan la ni lo - MHIP Gen.Hqrs.

MHIP Gen.Hqrs. chuan thuchhuah siamin, MHIP inthlan dawna ballot paper tihchingpen thubuaia hming lang, MHIP Gen.Hqrs. hruaitute chu thiam loh chang an ni lo a, an chungchang Court-in a la ngaihtuah chauh dawn tih an tarlang a; Court-a thu awm laia inchirhthehna a awm chu pawi an tih thu an sawi.

MHIP thuchhuah chuan, MHIP inthlana nomination box tih­chingpen duh lo pawl tih invuahte'n ‘MHIP hruaitute hi Court thubuai nei lai an ni a, hruai tlak an ni lo, báng rawh se’ an ti chu pawi an tih thu an tarlang a, "Police chargesheet-a kan lan avang hian thiam loh chang kan ni tihna a ni lo a, Court-in a la ngaihtuah dawn chauh a ni. MHIP Dan bu ang leh High Court thupek angin CYMA kaihhruaina hnuai­ah felfai takin kan inthlang a, inthlanna zah­awm taka thlan tlin kan nih avangin tun dinhmun­ah kan bânna chhan tur kan hre lo. Court-in thiam loh min chantir a nih phawt chuan kan bànsan zawk dawn a ni," an ti.

MHIP Gen.Hqrs. chuan, buaina chinfel a nih theih nan theihtawp an chhuah zel dawn tih sawiin, tun hnuah inpuhchhiatna leh ṭawngkam mawi lo tak taka inṭawng khumte awm tawh lo se an duh thu an tarlang a; MHIP tihmualpho leh tihbuai tumtute avang­a chi-ai lo turin MHIP member-te an chah a ni.