Serchhip JJB-in case 201 ngaihtuah tawh
Serchhip District Child Protection Committee chu nimin khan an chairman Sangchhin Chinzah, district bawrhsap hoin a pisaah an ṭhukhawm a, an hmalak tawhnate thlir letin, hmachhawp thar an neihte an sawiho. Kum 2012
aṭanga kumin September thlengin Serchhipa Child Welfare Committee-in case 437 leh Juvenile Justice Board-in case 201 an ngaihtuah tawh thu tarlan a ni.
District child protection officer (DCPO) Lalsiampuii Tochhawng chuan, District Child Protection Unit tum ber chu - Juvenile Justice (Care and Protection of Children) Act tihhlawhtlin a nih thu sawiin, "Naupang, kum 18 la pumhlûm lote kawng chi hnih - naupang enkawl leh venhim leh naupang dan kalha chete buaipui hi a hna ber chu a ni," a ti.
Child protection service hnuaiah committee pathum a awm. Child Welfare Committee (CWC)-in naupang enkawl leh venhim ngaite chungchang ngaihtuahin chawlhkar tin Thawhlehni leh Zirtawpni apiangin an ṭhu ṭhin a, kum 2012 aṭanga kumin September thlengin case 437 an ngaihtuah tawh. Member pathum awmna Juvenile Justice Board pawhin kum 2012 aṭanga kumin September thlengin naupang dan bawhchhiaa puhte thubuai 201 an ngaihtuah tawh a, naupang pathum special home-ah an dah mek. Special Juvenile Unit a awm leh bawk.
Serchhip district-ah naupang enkawl leh venhim ngaite leh naupang thil sual tia puhte awmna tur Child Care Institution pathum a awm a; Zoar Urban Deprived Children’s Home-ah mipa 10 leh hmeichhia pariat an awm mek a, Unity Orphanage Home-ah mipa pasarih leh hmeichhia paruk awm mekin, Observation Home-ah August 2016 - September 2019 thlengin naupang 63 an enkawl tawh.
Naupang harsate chhawmdawlna atan sponsorship pek ṭhin a ni a, kum 2012 aṭanga kumin January thlengin naupang 212 hnenah an pe tawh a, thla tin naupang pakhat hnenah Rs. 2,000 pek ṭhin a ni. Kum 2019-20 financial year chhung atan naupang 41 hnenah sponsorship an pe mek bawk.