John Williams Hospital Vision Centre hawng

Synod Hospital leh Mission for Vision, Mumbai chuan September 26, Ningani khan John Williams Hospital, Lungleiah mit lam enna tur Vision Centre an buatsaih chu hawn a ni a, Lunglei DC K Lalrinzuali, SP C Lalthanmawia leh sorkar hnuaia NPCBVI SPIO Dr Lalremmawii ten an hmanpui. 

Vision Centre hawnna inkhawm hi John Williams Hospital medical superintendent Dr Ramdinthara Sailo-in a kai-hruai a; Dr Lalremmawii chuan, Vision Centre hawn a ni ta chu Lunglei mipui bakah, Mizoram chhim lama awmte tan 

ṭangkai tak a nih a beisei thu sawiin, "Vision Centre-a thawkte'n sorkar­ah report an pek ṭhat a ṭul dawn a ni," a ti a, Synod Hospital leh sorkar­in thawhhona ṭha tak an neih thu a sawi.

Dr Lalremmawii chuan, kumin April-August chhungin Mizoramah mit naute zai mi 938 an awm thu sawiin, "Naupang leh puitling hnenah a thlawnin tarmitte sem a ni. Mizoramah Eye Bank pakhat leh Eye Donation Centre pahnih a awm a, kuminah mit darthlalang (cornea) thlak mi 22 an awm tawh a ni," a ti.

Synod Hospital-a opthalmologist Dr R Lalrindiki sawi danin, Synod Hospital leh Mission for Vision, Mumbai-te chu kum 2015 aṭangin an thawkho a, tunah hian Lungleiah phase VI an kalpui a, chuta tan chuan Mission for Vision-in Rs. 10,50,000 an thawh a ni.

John Williams Hospital Vision Centre-a thawkte chu thingtlang khuaahte kalin, mipui mit an enfiahsak ṭhin dawn a, mit zai ngai an awm chuan Synod Hospital-ah a thlawn veka zaisak tur a nih bakah, an kalna senso pawh tumsak vek tur a ni. John Williams Hospital bikah chuan ni tin (Pathianni tel loin) zing dar 9 aṭangin mit entir theih a ni ang.