Zoram Thar President UN Meeting-ah

Zoram Thar pawla hotu ber Rev. Dr Zaichhawna Hlawndo chu New York, USA-a United Nations General Meeting-ah a tel a; September 26, Ni­ngani khan University of New York-ah thu a sawi.

Zaichhawna Hlawndo chuan, Zo fate chu British sorkarin kum rei tak a awp hnuah India, Bangladesh leh Myanmar-ah ṭhendarh an nih thu te, Mizote'n hnam zia entawn tlak tak an neih thu leh awp beh leh ṭhendarh an nih avangin Mizo culture chîmrala a awm mek thute a sawi a, "Zo fate kan nihna ngai leh awm dan tur anga kan awm theihna turin UN-in dan mumal tak a siam hi chak taka bawhzui a ṭul,"a  ti.

UN-in khawvel pumpui hmasawnna tura hmalakna a siam, Sustainable Development Goal-a point 16 leh 17-te hlawhtlinna tur zingah Zo fate zalenna leh dikna chanvo chan theihna tura hmalak chu tihmâkmawh a nih thu a sawi bawk.