Vanglaini chawlh laia thil thlengte

DECEMBER 23, 2019

p    Tàn hun tihtawisak: Home minister Lalchamliana'n Armed Venga District Jail a tlawh a, táng mek zinga convict tawhte ngenna angin, an tàn hun chhung tur ni ngaa pawh tâwisak an nih tur thu a puang.

    Lalchamliana chuan, tángte chu an sual vang hrim hrima táng an nih a rin loh thu leh thil an tihsual vanga táng an nih a rin thu sawiin, thil tihsual an neihte sim a, an chhuah hunah pawh thil sual ti tawh lo tur leh nun dan dika an nun theih nan rilru siam turin a fuih a, "Sorkar pawhin jail hi inhremna ni loin, insiam ṭhatna hmunah a ngai a ni," a ti.

    Minister chuan, Commerce & Industries, Information and Communication Technology leh department dangte nen ṭangrualin jail tángte tan eizawnna kawng kawhhmuhna tur ruahmanna siam mek a nih thu a sawi a; Central Jail-ah pawh puantah, electronics leh computer zirna leh thil dang zirna kalpui mek a nih thu a sawi bawk.

    Home Minister hian Krismas ruai buatsaihna turin thawktute hnenah sum a hlan a; a tlawh lai hian Aizawl District Jail-ah hian táng 83 an awm a, chu'ng zinga 21 chu thiam loh chantir tawh (convict) niin, a bak mi 62 chu an thubuai ngaihtuah mek an ni.

p    No Vehicle Zone: Aizawl Bazarpui leh a chhehvela kea kalte an him zawk nan Zodin Square leh Chanmari kàwn inkarah lirthei kal phal loh hun, 'No Vehicle Zone' siam a ni. 

    No Vehicle Zone hi chawhma dar 10 aṭanga tlai dar 4 thleng siam a ni a, a huam chhungah lirthei zawng zawng tlan luh phal a ni lo a, damlohna leh thihna vanga tlàn ngei ngei ngaite erawh tlàntir an ni.

p    PAHOSS: Aizawla lirthei dahna in sa theite ṭanpuina, PAHOSS dawngtu tur thlangin PAHOSS Executive Committee an ṭhukhawm a, chairman Lalnunmawia Chuaungo, chief secretary-in a kaihruai. Meeting chuan, PAHOSS hnuaia parking house sakna tur thawh lina diltute an thliar a, dilna lut zingah 55 an ngaihtuah a, mi 37-te dilna pawmin, 18 chu ennawn leh tura dah a ni.

    PAHOSS hnuaiah hian a thawh khatnaah mi 99, thawh hnihnaah mi 45, thawh thumnaah mi 169-te dilna pawm a ni tawh a, a vaiin mi 313-te dilna pawm a lo ni tawh a; parking house sakna turin mi 60 hnenah cheng nuai 249 pek chhuah a ni tawh a ni.

p    Officer sîksawi: Mizoram sorkara thawk IAS leh service danga officer-te sîksawina thupek chhuah a ni. Power secretary ṭhin Dr Lal­zirmawia Chhangte, IAS chu Serchhip DC atan dah a ni a, Sangchhin Chinzah a thlak dawn. Lunglei DC K Lalrinzuali chu School Education Director atan dah a ni a, Lalzarmawii a thlak ang. Lalzarmawii chu secretary-ah dah niin, Printing & Stationary a enkawl dawn a; Rural Development additional secretary ni ṭhin V Lalsangliana chu Lunglei DC a ni dawn a, Higher & Technical Education secretary Biaktluanga chu Power & Electricity department enkawl tel tura tih a ni.

DECEMBER 24, 2019

p    No Vehicle Zone: Aizawl khawpui chhungah, Zodin Square leh Chanmari kâwn inkarah chawhma dar 10 aṭanga tlai dar 4 inkar chhungin No Vehicle Zone siam leh a ni a, mipuite chu zalen takin bazarah an kal vel thei. No Vehicle Zone hi mipuiin an hlut hle a, bazar tura chhuakvâk pawh an tam phah hlea hriat a ni.

p    Zu dap: Excise & Narcotics department enforcement-te'n Phunchawng leh Rangvamual leh a chhehvelah dan loa zu siam leh zuar dap beihpui an thlak a, rakzu litre 200 an man bakah, zu bilh lai ṭín 2010 leh zu siamna hmun pariat an tichhia.

p    Krismas urlâwk zan a ni a, mipuiin hlim tak leh muanawm taka an hman theih nan sorkarin hma a la a, hmun tam takah sorkar force-te duty tir an ni. Aizawl khawpui chhung hmun hrang hrangah police-te an duty a, an vei kual reng bakah, magistrate eng emaw zat an kal kual reng a; Excise & Narcotic pawh hmun hrang hrangah an duty a ni. Excise hian Krismas vuakvetah zu leh ruihhlo dang ṭhahnem tak leh a inhnamhnawih mi 17 an man. Aizawla veng hrang hrangah YMA-te'n duty an indah bawk.

DECEMBER 25, 2019

p    Krismas ní a ni a, Mizoramah kohhran hrang hrangin hlim takin an lawm. Kohhrante chuan Krismas hi an serh a, chawhma aṭangin inkhawm an nei a ni. Kohhran tam zawk chuan Krismas lawmna ruai an ṭheh lo a, kohhran ṭhenkhat erawh chuan ruai an ṭheh nghal a ni.

DECEMBER 26, 2019

p    Mizorama kohhran tam berin Krismas lawmna ruai an ṭheh. Sawleng Hmunṭha Presbyterian Kohhran Krismas ruai (Thlalak - David LRalte Rina)

DECEMBER 27, 2019

p    Kite Festival: Sialsuk khuain an khaw tlangah lehkhachaih chaih rûnpui, Kite Festival an buatsaih a, Tourism minister Robert Romawia Royte-in a hmanpui. Kite Festival hi December 27-ah buatsaih ṭan a ni a, December 28 leh 30-ah chhunzawm a ni. Mipuiin an hlut hle a, Aizawl leh khaw hrang hrang aṭangin mi ṭhahnem takin an hmang a ni.

    Robert Romawia Royte chuan, Sialsuk khawtlangin Kite Festival an buatsaih chu thil zawngchhang tlak a nih thu sawiin, sorkar nen 

ṭangkawpa phuisui zawka buatsaih theih a duh thu a sawi.

    Tourism Minister hian Mary Winchester mantu Sailam lal Bengkhuaia hmun hlui a tlawh nghal a; Phulpui GSA buatsaih Phulpui Haw Rûnpui Football League final a hmanpui a, Phulpui tlang - Zawlpala Thlàntlang leh hmun pawimawhte a tlawh nghal bawk.

DECEMBER 28, 2019

p    Zu siamna tichhia: Excise & Narcotics department enforcement-te'n Aizawl dáia zu siamna hmun eng emaw zat an tichhia a, heroin tam tham tak an man bawk. Krismas leh kumthar vuakvetah mipuite ralmuang taka an awm theih nan Excise & Narcotics chuan ruihhlo dap beihpui an thlak a, group pariatah inṭhenin, Phunchawng leh a chhehvela zu siamna hmun an dap ṭhin a ni.

    December 28-ah hian zu siamna hmun 16 an luhchhuah a, rakzu litre 320, zu bilh lai ṭín 1,930 leh zu siamna bél 51 an man a ni. Champhaia Excise & Narcotics enforcement pawhin Hringlang tlang péngah heroin gram 382.600 leh a neitua puh Runhleichhuma (29), Tahan 'G' Group, Myanmar-a khawsaa inchhál an man bawk.

DECEMBER 29, 2019

p    Excise & Narcotic department chuan Krismas vuakvêt, December 22-29 chhungin rakzu litre 1,300 chuang, zu bilh lai ṭín 4,000 chuang leh zu siamna hmanraw chi hrang hrang 60, sap zu ûm puitling 290, ûm chanve panga leh beer eng emaw zat an man a, heroin gram 562 an man bawk. Excise-te hi Krismas vuakvet chhungin ngawrh takin an duty a, duty post pangngai bakah hmun ṭhenkhat, a hming tihlan rem lohna laiahte an duty ṭhin a ni.

DECEMBER 30, 2019

p    CAA dodalna: Delhi-a awm Mizo zirlai, Mizorama rawn haw mekte chu Citizenship (Amendment) Act bakah, NRC leh NPR-te an duh lohzia lantirin Vanapa Hall kawtah an pungkhawm. Pungkhawmte chuan, CAA leh a kaihhnawih NRC leh NPR-te chu ram tana pawi thei leh thlei bik neihna a nih thu lemziak leh thuziak dangte hmangin an pholang a; political party emaw, pawl dang emaw thurualpui an nei lo tih an sawi. Mipuiin CAA nih phung an hriat chian theihna turin thuziakte an sem bawk.

p    Zokhawthar Police Outpost leh Dungtlang Police Outpost-te chu December 30-ah Mizoram sorkarin police station puitlingah a hlánkai. Sorkarin hriattirna a tihchhuaha a lan danin, Champhai district-a Zokhawthar leh Dungtlang PO-te chu dan leh thupek kenkawhna kawngah chak zawka hmalak a nih theih nan PS-ah hlankai a ni. Aizawl district Superintendent of Police hnuaia awm turin Seling Police Outpost leh Lengpui Airport Police Outpost bakah, Mamit SP hnuaia awm tur North Kanghmun Police Outpost-te siam thar a ni bawk.

p    Mizoram Presbyterian Kohhrana tualchhung kohhran hrang hrangte chuan Sunday School kai ṭha lawmman an sem. Lawmman hi pakhatna aṭanga pathumna thleng siam a ni a, naupangte mai bakah, puitlingte pawhin an hlimpui hle a ni. Kum 97 mi Hrangchhungi, Serchhip Kawnpui Kohhrana miin kai kim lawmman a dawng (Thlalak - Zualtea Fanai)

DECEMBER 31, 2019

p    Chawhnu dar 1:30 velah Amberly Vanlalmalsawmi (4) d/o Lalngaihsaka, Maubuang, Aizawl district chu Kolasib Diakkawnah Bolero car-in a chíl a, Kolasib District Hospital panpui a nih laiin a hliam tuar loin a thi.

p    Pachhunga University College-a security duty-te chuan Aizawl By-pass Road aṭanga PUC rama bawlhhlawh paihna motor hmanga bawlh­hlawh paih tum an man a, motor khalhtu chu police hnenah an hlân.

p    Coordination Committee on Traffic Management ruahman angin chaw­hma dar 10 leh tlai dar 4 chhungin Aizawla Zodin Square leh Chanmari kâwn inkarah lirthei kal phal lohna hmun No Vehicle Zone siam leh a ni.

p    Zanah Lal Malsawma, Dawrpui chu an vengah bike-in a su hlum. Lal Malsawma hi chief minister Zoramthanga lehkhabu ziah, 'Mizo Hnam Movement' tih sap ṭawnga lettu a ni.

p    Kum hlui 2019 thlah zan leh kum thar 2020 lawm zan a ni a, Mizoram pumah mipuiin hlim takin an hmang. Mizoramah hâlpuah leh hâlmawi khap ni mah se, Aizawlah chuan kum hlui thlah nan leh kum thar lawmna atana halpuah leh halmawi hâl hmuh tur leh hriat tur a tam hle a, meithallawn hmuh tur a awm bawk.

    Kum hlui thlah zanah hian buaina leh harsatna a thlen loh nan magistrate, police leh khawtlang duty-te'n theihtawp an chhuah a; magistrate-te chuan khawpui chhung an fan kual bakah, police-te chu patrol-in an kal kual reng a ni.

JANUARY 1, 2020

p    Isaac Zothankhuma (38) s/o H Remtluanga, Saikhamakawn, Aizawl chu zing dar 5:30 velah Dawrpui Vengthara a riahna ṭhenawmte garage-ah thia hmuh a ni. Thu dawn danin, Isaac Zothankhuma taksaah hliam a awm nual a; a malpui veilam ruh a tliak a, a nâk veilam ruh pali a tliak a, a lu-ah hliam a awm bawk.

p    Chhun dar 12 velah Thingdawl khaw dai, Kolasib lamah car leh bike an insû a, mi pakhat a thi. Thu dawn danin, an insutna avang hian car chu a ke a puak a, kawng thlang lamah a tlan a, car-a chuang pahnih zinga pakhat zawk Lalchungnungi (48) Falkland Veng, Aizawl nia hriat chu a hmunah a thi a ni.

p    Mizorama kohhran hrang hrangin kum thar lawmna hun an hmang. Kum thar lawm nan hian kohhran tam ber chu an inkhawm a, Mizoram hmun tam zawkah chuan ruai ṭheh a ni. Aizawl khawpuia kohhran tam zawk erawh chuan January 1-ah hian ruai an ṭheh lo a, January 2-ah an ṭheh tlangpui tawh a ni.