Mizoramah African Swine Fever la hmu lo Aizawlah vawk sa lei tur a váng

Vanglaini palai zawhna chhangin Dr K Beichhua chuan, Mizoramah ASF natna hmuh la ni lo mah se, inthlahdah chuan Mizorama rawn lut thei reng a nih thu a sawi a, "ASF a lo luh lohna atan theihtawp kan chhuah zel a ni. Mahse, ram páwn aṭanga vawk la lut lui tlat an awm a, kan fimkhur loh chuan kan dinhmun a him lo thei," a ti a; ASF a lo luh chuan Mizoramin chhiatna nasa tak a tawh theih thu a sawi.

AH&Vety Minister chuan, tun dinhmunah vawk sa lei tur váng mah se, mipuite chu phun nâwi mai lo turin a ngen a, "Tuna vawk sa váng hi nakin zelah kan la hnianghnarna tur zawk a ni," a ti. ASF hi Myanmar ramah a léng tih August 14, 2019 khan finfiah a ni a, chuvang chuan AH&Vety department chuan ram páwn aṭanga vawk lak luh a nih lohna atan khauh lehzualin hma an la a ni.

Mizoram sorkarin Mizoram pawn aṭanga vawk lak luh a khap avang hian Mizoramah vawk sa a váng hle a, vawk talh ṭhinte talh zat pawh a tlahniam hle. Aizawl New Market-a vawk sa zuarte chuan, state páwn aṭanga vawk lak luh sorkarin a khap hmain chawlhkar khatah vawk 300 vel Mizoramah a luh ṭhin thu leh, Inrinni tûk khatah vawk 30 vel an talh ṭhin. Tunah erawh chuan vawk talh tur an hmuh tam berin panga vel an talh ṭhin thu an sawi a; veng hrang hranga vawk talh ṭhin an ṭhiante pawhin talh tur an hmuh zawh ṭhin loh thu an sawi a ni.

Aizawlah vawk sa lei tur váng mah se, bawng sa hralh a kal phah chuang lo niin Aizawl New Market Sa Zuar Controller Board president F Vanlalbela chuan a sawi a; ar leh sangha erawh hralh a kal phah deuh thung niin a sawi.

F Vanlalbela chuan, sorkarin ram páwn leh state ṭhenawm aṭanga vawk lak luh a khap laiin, sa rêp leh vawk sa aṭanga siam ei tur dangte erawh chu a rawn lut reng tho niin a sawi a; sorkarin enfiah se an duh thu a sawi a ni.