Ram danga hna thawh tumte Police-in fimkhur turin an chah

Mizoram Police chuan thuchhuah siamin, ram danga hna thawk tura chhuah tumte chu fimkhur turin an chah a, "Document leh passport dik tak hmanga danin a phal ang thlapa kal hi mahni himna a ni tih hria a, danin a phal ang thlapa kal turin kan ngen a ni," an ti.

Mizoram Police tarlan danin, tun hnaiah ṭhalai eng emaw zat chu China, Singapore, Malaysia leh Macau, etc.-ahte inhlawh tur leh hna chi hrang hrang thawk tur eng emaw zat an kal tawh a; hlawh tam zawk hmu tura ram danga kal chu thil duhawm tak angin lang mah se, him lohna tam tak a awm a ni.

Ram danga kal duh luat vanga document dik lo leh dan phal loha kal te, miin an bum avang leh chincháng hriat loh lutuk vanga dan bawhchhiaa kalte an awm ṭhin. Dan bawhchhia man chhuah, buaina khirh tak tak tâwk an awm tawh a, an hnathawhna ram aṭangin awlsam taka India rama thawn haw theih an nih loh avangin harsatna tâwka tangkhangte pawh an awm ṭhin.

Document dik lo leh siam chawp hman te, India mi tan Myanmar passport lem hmante chu dan bawhchhiatna lian tak a ni. Myanmar passport hmanga kalte chu Myanmar khua leh tui angin ram danga an kal tawh avangin harsatna leh buaina an tâwk a nih pawhin, Mizorama an ruang lak luh pawh a theih tawh ṭhin lo a ni.