Shillong MSU-in an din champha an lawm

Shillong Mizo Students Union (MSU) chuan September 28, Inrinni khan Shillong-ah an din champha an lawm.

He hun hi Higher & Technical Education minister Dr R Lalthangliana leh minister of state Robert Romawia Royte-ten an hmanpui.

Shillong MSU pre-sident hmasa ber Dr R Lalthangliana chuan, Shillong MSU chu November 1, 1979-ah All Mizo Students Federation (AMSF) leh Mizo Zirlai Pawl (MZP)-te inchhûn fina din a nih thu sawiin, "Shillong MSU motto chu 'For Mizo nation’ tih a nih angin, Mizo nationalism tana ding a ni," a ti a; zirlaite chu mahni inrintâwkna leh taimakna nen kawng engkimah thiam bik ni tura zir turin a fuih.

Minister Robert Romawia Royte pawhin thu sawiin, "Shillong hi hmanlai aṭang tawhin Zo fate'n zirna ṭha an dawnna hmun a ni. Mizote zingah Shillong-a zir chhuakte chu sumdawnna, politics leh sorkar hnaah pawh mi hlawhtling an lo ni tawh ṭhin. Tuna zirlai awmte hian lehkha zir chu in kal chhan a ni tih hria a, nu leh pate'n an beisei an ngeia result ṭha tak nei turin taima takin lehkha zir ang che u," a ti. Shillong MSU-ah hian member 3,500 vel an awm mek a ni.