MZP-in Vairengte chhehvel an tlawh Ramri thilah ke kan pen zel dawn - MZP President

MZP General Headquarters hruaitute chuan September 28, Inrinni khan Vairengte dáia sipai camp hluia awm mek Indian Reserved (IR) police te, Vairengtea temporary ILP siamna hmun leh Assam sorkarin tun hnaia sipai awmna hlui an chei ṭhat Forest beat post-te an tlawh.

MZP hruaitute hi General Hqrs. aṭangin president L Ramdinliana Renthlei leh hruaitu eng emaw zat an ni a, Kolasib aṭangin MZP headquarters hruaitute, Vairengte aṭangin sub-headquarters hruaitute leh JAC on Inner Line Reserved Forest hruaitute an tel bawk.

L Ramdinliana Renthlei chuan, MZP chuan tun hma aṭangin ramri a vei em em ṭhin tih sawiin, "MZP chu ramri chungchangah ke a pên zel dawn a ni," a ti a; ramria Mizoram police an awm avangin Mizo mipui an thlamuang tih a sawi. Tuna IR temporary post chu sorkarin a titawp leh mai ang tih an hlauh thu sawiin, "Vairengte khua bakah Mizo mipuite'n police camp puitling a nih kan duh hle. Mizoram sorkar pawh IR sipaite la chhuak mai lo a, an awm hlen theih nan a theih ang anga chei ṭha turin leh la chhuak tawh lo turin kan ngen a ni," a ti.

MZP hruaitute hi sub-inspector Vanlalhruaia leh a hoten an lo dawngsawng a; MZP chuan IR camp-a an mamawh nia an hriat tuizem litre 1,000 dawng leh tui dah thianghlimna filter an pe a ni. MZP tarlan danin, tun dinhmunah Vairengte dáia IR camp-ah hian driver leh 4th grade-te nen 17 an awm mek a, an indaih loh avangin patrolling ti tura tih ni mah se, an ti thei lo a, kal velna tur motor an nei lo bawk.

MZP hruaitute chuan Lailapur bula Assam Forest department-in beat post an sak chu an tlawh nghal a; Assam Forest beat post chu a changtlung tawh hle tih sawiin, "Ni tin duty panga an awm ṭhin a, Forest thil bungrua lut leh chhuak an hriatte an lo endik ṭhin a ni," an ti.

Vairengtea temporary ILP siamna pawh an tlawh a, "ILP counter-a duty-te'n Assam NRC demand a nih aṭangin ILP siam an tlêm sâwt thu an lo sawi a, ni tin hnam dang 15-20 vel NRC nei lo ILP an siamsak loh ṭhin thu leh an tam ní chuan mi 40 vel an kal ṭhin thu an sawi," an ti a; ILP counter-ah chuan NRC-a chuang lote chu temporary ILP an siamsak ngai lo niin an tarlang.