KHAWTHLIR

Inrinni khan Republic Bial ṬKP chuan Aizawl Civil Hospital tan thisen unit 42 an pe a, petute mipa 38 leh hmeichhia pali an ni a; Allahabad Mizo Welfare Association pawhin Allahabad khawpuiah The Leprosy Mission tan thisen unit 40 an pe a, mipa 38 leh hmeichhia pahnih an ni. Inrinni vêk khan Dinthar Vengthlang Branch KṬP chuan an Kohhran Hall-ah blood donation camp huaihawtin, Synod Hospital tan mipa 34 leh hmeichhia pakhatte'n unit 35 an pe a; Aibawk Bial KṬP-in Zoram Medical College tan thisen unit 27 an pe bawk a, petute mipa 25 leh hmeichhia pahnih an ni.

Indian Medical Association (IMA), Mizoram State Branch leh Darlawn Welfare chuan Indian Dental Association, Mizoram Government Doctors Association leh Rotary Club-te nen ṭang-hoin September 27-28, 2019 chhung khan Darlawnah hmar tlangdung mipui tan Special Clinics an buatsaih a; khaw 15 aṭangin mi 3,282 an inentir. Special clinic-ah doctor 32 leh thawktu dangte'n mipui hriselna an enfiah a, kháwl hmangin mi eng emaw zat an endik bakah, a thlawnin damdawi an pe a ni.

MJA president Zonunsanga Khiangte chuan September 28, Inrinni tlai khan Sihphir community hall-ah 12th Mizoram State Fencing Championship 2019 khârna a hmanpui a, intihsiaka ti ṭhate hnenah lawmman a hlan. MJA President chuan, fencing chu mipui náwlpui hriat lâr ni lo mah se, fencing player-te'n national level-a gold medal leh medal dang ṭhahnem tak an la tawh chu ropui a tih thu a sawi. Fencing intihsiakna hi September 27-28 chhungin neih a ni a, mi 54 an tel a ni.

Mara Students' Organisation (MSO) chuan Inrinni khan Pachhunga University College multipurpose hall-ah fresher social an hmang a, minister of state Dr K Beichhua'n a hmanpui. Minister chuan, zirlaite mamawh chu quantity ni loin quality a nih thu sawiin, "Lehkha-thiam nih mai a tâwk lo a, zirlaite'n quality ṭha nei tura an zir a ngai," a ti. MADC executive member i/c Education K Hrahmo pawhin thu a sawi a ni.