Rashtriya Poshan Maah neih mek pualin Nutrition Marathon 5K Run buatsaih a ni
India rama chaw ṭha ei pawimawhzia inzirtirna scheme, Rashtriya Poshan Abhiyaan (National Nutrition Mission) hnuaia Poshan Maah (Nutrition Month) kalpui mek pualin September 28, Inrinni zing kar khan Women & Child Development (WCD) department chuan Aizawlah marathon - Nutrition Marathon 5K Run an buatsaih.
Nutrition Marathon 5K Run-a thupui chu 'Run for a cause. Run to beat malnutrition in Mizoram' tih a ni a, mi ṭhahnem tak telin, Social Welfare minister Dr K Beichhua'n a vai liam a ni. Dr K Beichhua chuan, taksa hriselna ṭha nei turin ei tur ṭha ei a ngai tih sawiin, "Naupang, ṭhang lai leh nu nau pai leh hnute pe laite'n ei tur ṭha an hmuh theihna turin sorkarin ruahmanna a siam a ni," a ti.
WCD director Vanlalpianpuii chuan, naupang ṭhan a ṭhat theih nan nu-in nau a pai aṭanga naute kum hnih an tlin thlengin enkawlna uluk taka pek a pawimawh thu a sawi. Mizorama Poshan Abhiyaan brand ambassador S Malsawmtluanga pawhin thu sawiin, eng kawng pawh zawh dawn ila, ei leh in leh hriselna uluk a ṭul thu leh, ei leh inin hma lam hun thui tak a hril thu a sawi a ni.
Nutrition Marathon 5K Run-ah hian mi 1,000 chuang an tel a, puitling mipa, hmeichhia, under-15 leh under-10 category siam a ni a; category tinah lawmman pakhatna aṭanga pathumna siam niin, pawisa, medal leh thuchei hlan an ni.
Poshan Abhiyaan-in a tum chu, chaw ṭha ei loh vanga naupang ṭhanṭhu leh chêr lutuk tihtlem te, nu, naupang leh tleirawl zinga thisen tlâkchhamna (anaemia) tihtlemte a ni.
Lawmman dawngtute
Men Category
1-na: David Siamkima (Rs. 10,000)
2-na: Lalhmangaihzuala (Rs. 7,000)
3-na: Benjamin Lalthlanmawia (Rs. 5,000)
Women Category
1-na: PC Lalhmingmawii (Rs. 10,000)
2-na: Mimi Vanlalṭhazuali (Rs 7,000)
3-na: Zodinpuii (Rs. 5,000)
Under-15 Category
1-na: John Lalremruata (Rs. 5,000)
2-na: KC Lalremruata (Rs. 3,000)
3-na: R Lalremsanga (Rs. 2,000)
Under-10 Category
1-na: Ian Lalremruata (Rs. 3,000)
2-na: HC Lalduhawma (Rs 2,000)
3-na: Samuel Lalthlamuana (Rs. 1,000)