DD hmu tur Hawla MPCC-in an lawmpui

Mizoram Pradesh Congress Committee (MPCC) Media department chuan thuchhuah siamin, India rama Pathian thu zirna hlun ber leh theological college tam tak inziah luhna Serampore College (University)-in chief minister hlui Lal Thanhawla, MPCC president hnena honorary doctorate degree, Doctor of Divinity (DD) an hlan tur chu ropui an tih thu an tarlang.

MPCC chuan, Serampore College-in Lal Thanhawla hnena DD hlan an tum chhan chu kohhran leh khawtlang tana a thawh hlâwk em vang a ni tih sawiin, "Mizorama kohhran hrang hrangte nena inzawmna nghet tak nei Serampore College-in Pu Lal Thanhawla honorary doctorate degree a hlan tur hi ropui kan tiin lawmawm kan ti hle a ni," an ti.

Lal Thanhawla chu India ram, Hindu kulmûk tamna ramah ram hruaitu lawkte zing-ah pawh Kristian hruaitu anga hriat ṭhin a ni tih sawiin MPCC chuan, "India rama Kristian tlemtê awmte tan a chhuanawm-in a thlamuanpuiawm hle ṭhin. India ram hmun hrang hrangah kohhran leh institution hrang hrangte'n an hun pawimawhah an sáwm fo a, a theihna apiangah a telpui ṭhin a ni," an ti a; India rama Kristiante programme-ah a telpui ṭhin avangin sakhaw dang kara Kristian awmte'n ngaih pawimawh an hlawh tih an sawi.

Congress party chuan, Lal Thanhawla chu Mizo Kristiante chawimawitu langsar tak  nia sawiin, "India ram hmun hrang hranga Kristiante'n tihduhdahna an tawh chángin Pu Lal Thanhawla hi Kristiante thlavâng hauhin na takin a

ṭawng chhuak ṭhin a, tihduhdah tuarte'n an thlamuanpui ṭhin hle a ni," an ti.

MPCC chuan, ṭum nga Mizoram chief minister ni thei Lal Thanhawla'n Serampore College (University) aṭanga DD a dawng tur chu Mizo Kristiante tan a hlu hle tih an sawi a; politics lama Kristian hruaitu langsar Nagaland CM leh state hrang hranga Governor ni tawh SC Jamir pawh Serampore College-in DD an hlan tawh thu an sawi bawk.