JNV, Thenzawla thil thleng chhui zui a ni

Jawahar Navodaya Vidhyalaya (JNV), Thenzawlah chi inthliarna a awm ang leh chumi vanga Chakma zirlai kutthlak anga tun hnaia social media-a thu thehdarh chu thu dik tâwk lo a nih thu leh, pawisa bo chungchanga an indâwpnaa thil thleng a nih thu sawi a ni.

Chakma pakhatin social media-ah, JNV Thenzawla pawl 12 zirlai Chakma pakhat chu Mizo zirlaite'n iron rod hmangin an vua niin a tarlang. Thil thleng chungchang chu Thenzawla chanchinbumite'n an bawhzui nghal a, JNV-a school captain Lalnunhlima bakah, Mizo leh Chakma zirlaite chu thu zawhfiah an ni.

Vantawng chanchinbu editor Liantluanga Renthei hnena JNV captain Lalnunhlima sawi danin, September 25, 2019 khan JNV hostel-a awm mi pahnih pawisa, Rs. 1,000 leh Rs. 250 a bo a, September 25 zanah zirlaite an inko khawm a, pawisa rutu chu dah lêt turin an inhriattir a ni. Mizo pahnih leh Chakma pahnih chu a bika thu zawhfiah an ni a, mahse, Mizo pahnih leh Chakma pakhat zawk chu pawisa latu an ni thei loa hriat a nih leh avangin, Chakma zirlai pakhat chu thlùr bing a ni.

Zirlai an inkoh khawm hnuah pawisa bo Rs. 250 zawk chu tu tih hriat lohin a dah lêt a, Rs. 1,000 bo zawk chu dah lêt a ni lo. Chuvang chuan September 26 zanah zirlai an inko khawm leh a, chutah chuan pawisa rutu nia rinhlelh Chakma zirlai pakhat chu thu zawhfiah a ni. Chutianga an tih chu chi inthliarna leh inhmuhsitna thil a ni lo a, hostel-a pawisa bo hmuh lêt an tum vanga inzilhna a nih thu an sawi.

Zirlai kut tuar nia sawi chu September 27 zingah Integrated Ayush Hospital, Thenzawlah hruai a ni a, first aid pek a nih hnuah JNV-ah hruai lêt leh nghal a ni. Thil thleng chungchangah zirlai kuttuartu chhungte chu September 28, Inrinni khan Thenzawl JNV-ah an kal a, JNV hotute nen thil awm dan an sawiho. Social media lama boruak ṭha lo záwnga thu a darh chu pawi an tih thu, JNV Principal leh thawktute bakah, kuttuartu nu leh pate chuan an sawi a, chutiang thil chu thleng tawh lo se an duh thu an sawi bawk.

Zirlai kutthlak nia sawi hi chhui chiang turin JNV, Lungleia principal ni mek leh hun rei tak Thenzawl JNV-a principal ni tawh JC Lalsangzuala ruat a ni a, JC Lalsangzuala chuan nimin khan Thenzawl JNV chu a hmunah a tlawh a ni.

JNV, Thenzawlah hian zirlai 206 an awm mek a, Chakma zirlai pawh mi 35 awmin, mipa 25 leh hmeichhia 10 an ni. Social media lama thuthang a awm avang leh Chakma zirlaite'n an duh zawk avangin Inrinni zan aṭang khan Chakma zirlai mipate chu hostel/in pakhatah a hlanga awmtir an ni.