Mizoram Rural Bank-in an din champha an lawm

Mizoram Rural Bank (MRB) chuan September 27, 2019 khan Dawrpui Multipurpose Centre-ah an din champha vawi 37-na an lâwm a, Rural Development minister Lalruatkima'n a hmanpui.

Lalruatkima chuan, Mizoram mai ni lo, India ram pum anga chhûtin rural bank-te'n ram economy-ah hmun pawimawh tak an luah thu a sawi a, "All India Rural Credit Survey Committee-in kum 1952 khan ngaihtuahna thar siamin, thingtlang kilkhâwr ber thleng pawha hman theih tur financial institution (bank) din a ngai a ni tih a hria a, chumi kal zelah chuan India sorkarin thingtlang leh hmun kilkhawr zawkte mamawhna hriain bank a hranpaa siam a tum a ni. Banking Commission-in kum 1972-ah rural bank siam a rawt chhuak ta a ni," a ti.

Minister chuan, rural bank din chhan ber chu, lo neitute leh thingtlanga kut hnathawka eizawngte dâwm kân a nih thu sawiin, "A din chhan hi hre rengin, MRB-a thawkte pawhin mipui leh ram hmasawnna kan kutah a innghat thui hle a ni tih hre chunga ṭan la zual turin ka chah a ni," a ti a; mahni hna ṭha taka an thawh avanga mite'n an fakna ringawtah duh tâwk lo a, hna chu Pathian leh mipui rawngbawlna a ni tih hre chunga thawh a pawimawh thu a sawi.

Inkhawmah hian MRB chairman V Jaya Chandra chuan, MRB branch ṭha thlan chhuah 10 hnenah lawmpuina leh chawimawina thilpek a hlan.

MRB hian an din champha pual hian Muanna In, Mualpuiah refrigerator leh carrom board an pe a; Abundant Life Home, Durtlang hnenah inverter lian, Gan Sabra, Luangmual hnenah water filter leh Hmangaihna In, Durtlang hnenah Rs. 50,000 an pe bawk.

MRB hi Regional Rural Bank Act, 1976 tlawh­chhanin September 27, 1983-ah din a ni a, scheduled bank niin, India sorkarin commercial bank dangte nen inanga a ngaih a ni. Mizoramah branch 85 an nei mek a, Mizoram chhung­a RD block zawng zawng­ah branch an nei kim tawh.