Police-in zanah surprise checking an nei

Aizawla police station hrang hranga mite chuan tunlai hian zan rei lamah khawpui chhung kawngpui lûn laiah surprise checking an kalpui a, lirthei tlânte an endik ṭhin a, dan bawhchhia lirthei eng emaw zat an man tawh.

Motor endik chung­changa Vanglaini palai zawhna chhangin Aizawl SP C Lalzahngoa chuan, surprise checking an tih chhan ber chu, zan rei lama mi dang tana him lo thei motor tlân chak lutuk leh bengchheng lutuk, mipui tiralmuang lo thei thil tihreh tumna vang a nih thu a sawi a, "September 27, Zirtawpni zan aṭang khan Aizawl police station hrang hranga mite'n an area-ah a remchan angin surprise check hi an kalpui a, hun remchangah tih chhunzawm zel tum a ni a, mipui pawh an fimkhur a ṭha ang," a ti.

Aizawl SP chuan, traffic police-te zan dar 9 thleng khawpui chhungah an duty a, chumi hnu, zan dar 10 vel aṭangin Aizawla PS hrang hranga police-te chu duty ve thungin, zanlai thlengte an duty a; lirthei - a bikin dan bawhchhiaa rinhlelhte an en uluk zual a, lirthei tlan zawng zawng erawh an endik lo. Lirthei khalhtu zu rim namte chu breath analyser an hamtir zel bawk.

Police-in September 27 zan aṭanga an endik tawh chinah dan bawhchhiaa lirthei khalh eng emaw zat an man tawh a, zu phur man an nei nual tawh bawk a ni.