Mi pathumin nunna an chan phahna BSUP chhiatna chhui zawh a ni tawh
July 2, 2019 tlaia Durtlang Leitana Basic Service to Urban Poor (BSUP) Housing Complex-a chhiatna thleng chungchang chhui tura sorkarin magisterial inquiry a din chuan thil thlen dan leh a kaihhnawih thilte a chhui zo tawh.
Vanglaini palai zawhna chhangin magisterial inquiry anga he chhiatna thleng chhuitu Aizawl DC Vanlalngaihsaka chuan, chhui chian hna an zawh tawh thu a sawi a, "Kan thil chhuina report chu July 30, 2019 khan Chief Secretary hnenah kan thehlut tawh," a ti a, report a thehlut tawh tih bak ani chuan sawi tur a neih loh thu a sawi.
BSUP Complex-a chhiatna thleng chhui chiang tur hian Mizoram sorkar chuan July 10 khan Aizawl DC Vanlalngaihsaka a ruat a, magisterial inquiry anga a thil chhui chhuahte chu thehlut tura tih a ni a, chhuina hun atan chawlhkar hnih chhung hun pek a ni.
Aizawl DC chuan state páwn lam mi thu zawhfiah ngaite an awm avangin chawlhkar hnih chhungin chhui hna a zo hman lo a, chawlhkar khat dang hun a dil belh angin pek a ni a; hun a dil belh a zawh hmain a chhui zo ta a ni.
Tarlan tawh angin Durtlang Leitan BSUP hmuna chenna in 20 zinga pathum, July 2, Thawhlehni tlai dar 6 pelh hreta lei leh lung tawlhin a tihchhiatah khan mi pathum an thi a, mi 11 in hliam an tuar a ni. Chhiatna thlenna hmun a tlawh ṭumin chief minister Zoramthanga chuan he thil thleng chhui tur an din tur thu hi a lo sawi tawh a, "Tun hnu zelah pawh kan tih tur leh kan tih loh tur kan hriat theih nan a ṭul angin eng nge enfiah ngai, enfel ngai tihte chhui tur kan siam ang," a ti a; thil tisual an awm chuan dan anga kalpui mai tur a nih thu a sawi.