Doctor-te'n lungawi lohna an lantir

India ram puma medical doctor-te intèl khawmna, Indian Medical Association (IMA) chuan nimin khan zing dar 6 aṭanga darkar 24 chhung India ram pumah lungawi lohna an lantir a, hna an thawk lo.

IMA nawrhna hi IMA Mizoram State Branch pawhin an thlâwp a, mahse, hnathawh erawh châwl ve loin, an hnathawhna hmunah lungawi loh lantir nan badge dum an bel a ni. IMA lungawi loh chhan chu, sorkar laipuiin Lok Sabha-ah Medical Council of India (MCI) thlakna tur dan National Medical Commission Bill a pass vang a ni. National Medical Commission Bill hi Lok Sabha-ah chuan kum 2017-ah pass a ni tawh a, mahse, Rajya Sabha-ah BJP leh an thurualpui (NDA)-te'n member ngah tâwk loh avangin Rajya Sabha-ah an pu lut ngam lo a, kumina Parliament-a bill thi (lapse) 22 zingah a tel.

BJP kaihhruai Lok Sabha thar kumin May thlaa din a nih leh hnuah sorkar laipui chuan NMC Bill chu a tharthawh leh a, July 29, 2019 khan Union Health minister Harsh Vardhan chuan Lok Sabha-ah a pu lut a; sawiho a nih hnuah Lok Sabha MP 260-in an pawmpui a, an pass ta a ni. Bill hi Rajya Sabha-ah pass a nih a, President-in a pawmpui bawk chuan hman a ni ang.

NMC Bill-a IMA-in an duh loh chu - medical education leh member ruat dan chungchang a ni. MBBS zir lo a, medical course stream danga mite'n bridge course (thla ruk zir) an zawh hnuah qualified medical doctor ang chiaha damlo an en a, allopathic drug an chawh thei tura ruahman a ni chu an duh loh lian ber pakhat a ni bawk.

Bill-a an ziah dan chuan, MCI titawpin, National Medical Commission din a ni ang a, NMC-ah chuan member 29 an awm dawn a, member zinga 20 chu nomination hmanga ruat tur niin, pakua chu thlan tur a ni.