Vawiinah electoral roll ennawn ṭan a ni dawn

Mizoram chief electoral officer (CEO) Ashish Kundra Election Commission of India (ECI) duh dan angin electoral roll ennawnna chu August 1, 2019, vawiinah ṭan tur a nih thu a sawi. 

CEO hian nimin khan a pisaah electoral roll ennawn chungchanga hmalakna kalpui dan tur political party aiawhte a sawipui a, "Electoral roll ennawn hna hi August 1, 2019-ah ṭan tur a ni a, kum 18 tling thar, electoral roll-a telh belh turte leh paih ngaite bakah, thil dang vanga siamṭhat ngaite chu hemi chhung hian ennawna ṭha taka kalpui tum a ni," a ti.

CEO chuan, Electors Verification Programme (EVP) hmanga pre-revision-a bul ṭan a nih tur thu a sawi a; tlawmngai pawlte leh political party-te nen thawhhona ṭha neih a ngaih nasat tur thu sawiin, political party aiawha lo kalte chu electoral roll ennawn kawngah a ṭul apianga thawktute ṭawiawm turin a ngen.

Mizoram hmun hrang hrang aṭanga electoral roll ennawn leh endikna hna chak zawka kalpui a nih theih nan inthlunzawmna ṭha, common service centre (CSC) buatsaih tum a nih thu sawiin CEO chuan, polling station-a voter tam dan azirin section-a ṭhen a nih tur thu a sawi a, "Voter-te an awmna hmun azirin section-a ṭhen a nih chuan, inthlan kalpui hi a felfaiin a awlsam phah hle beisei a ni a, by-election buatsaih a ngaih cháng pawhin inthlan buatsaih a awlsam phah hle rin a ni," a ti.

Inkawmhonaah hian joint CEO H Lianzela leh assistant CEO Malsawmzuala ten electoral roll ennawnnaa hriat tur pawimawhte an hrilhfiah a ni. Electoral roll ennawnna hi pre-revision hmangin vawiinah ṭan a ni dawn a, August 31, 2019 thleng Electors Verification Programme (EVP) neih a ni ang. Chumi chhung chuan voter-te'n voter helpline mobile apps - NVSP portal emaw, CSC kaltlangin electoral roll-ah mahni inendikna hun an nei ang.

September 1-30, 2019 chhungin booth leval officer (BLO)-te'n house to house verification (in tina luta endikna) an kalpui dawn a, electoral roll-a thun thar, paih leh siamṭhat ngaite an chhinchhiah ang. October 15, 2019-ah integrated draft electoral roll tihchhuah hman beisei a ni a, January 1-15, 2020 chhungin ECI-in hun a ruat dan azirin final electoral roll tihchhuah tur a ni.