Leimin vangin buhfaia harsatna tâwk Report kan dawng lo - FCSCA Minister

Food, Civil Supplies & Con­sumer Affairs (FCSCA) minister K Lalrinliana chuan, tun hnai ruahsûr vanga leimin leh kawng chhia avangin buhfaia harsatna tâwk report an la dawn loh thu a sawi.

Vanglaini palai zawhna chhangin FCSCA Minister chuan, fûr atan buhfai an chhêk khawl ṭhat thu a sawi a, "Hei vang hian tun hnaia leimin leh kawng chhia avanga harsatna tâwk an la awm loah kan ngai a, report kan dawng lo. Kan han en chiang a, hmun ṭhenkhatah phei chuan thla 10 daih tur kan dah khawl a ni," a ti.

K Lalrinliana chuan, buhfai an dah khawlna hmunte chu National Highway 54 kawng dung ni loahte a nih thu sawiin, "NH-54 in a paltlang kawngpui dungahte hi chuan kan ngaih a ṭha a, kan dah khawl tam lo," a ti a; NH-54 kawngpui dung aṭang pawhin nimin thleng kha chuan harsatna tâwk report an la dawn loh thu a sawi.

FCSCA Minister sawi danin, Mualkhang leh Buichali inkarah kawngpui a chhiat rei chuan NH-54 kawngpui dunga awmte'n buhfaiah harsatna an tâwk theia ngaih a ni. Kawng chhiaah hian tipper-te chu JCB hmangin nawr chhuah an ni a, truck ke 12 neite chu an motor body thir a nih loh avangin motor chhiat hlauhthawn avangin nawr chhuah a ni ve lo.

K Lalrinliana chuan, ration chini chu AAY hnenah chauh lo, mi dang hnenah pawh sem an châk thu sawiin, "Sum ngai zat turte kan chhût chhuak nasa a, tun dinhmunah chuan pawisa kan la nei rih lo," a ti a; AAY-te tan chini sem tura an inbuatsaih leh mek thu a sawi.