Mizoram sorkarin rua/mau lâk luh a la nei lo

Horticulture department chuan, state páwn aṭangin Mizoram sorkarin kuminah mau/rua lak luh a la nei lo tih an tarlang. Hetih lai hian, Horticulture department changtu chief minister Zoramthanga chuan, July 15, 2019 khan, Mizoramah raw chi eng emaw zat a lo thlen tawh thu leh 3,000 vel chu hardening ti tura a ṭiak phun a nih thu a sawi.

RTI Act hmanga Samuel Lalruatsanga zawhna, Horticulture department SPIO-in July 29, 2019-a a chhan danin, Horticulture department-in tun thlengin rua/mau chî state páwn aṭanga lâk luh a la nei lo. Rua/mau chi supply turin tu nge/eng company nge thlan a nih, tih zawhna chu, "Rua/mau chi supply turin mimal emaw, company emaw thlan a la ni lo," tiin an chháng.

Rua/mau chi supply-tu tur nena inremna neih a nih tawh dan zawhna chu, supply-tu tur thlan a la nih loh avangin inremna siam a la awm loh thuin an chháng a; supply-na tur rate pawh siam a la nih loh thu an tarlang. Thla/kum khat chhungin rua/mau chi supply tur zat siam a la nih loh thu te, rua/mau hardening ti turin farm rawih an la awm loh thu te, mau/rua chíngtu tur chungchangah ruahmanna a la awm loh thute an tarlang bawk.

Rua/mau hardening tihna tur sorkarin a neih leh neih loh chungchangah Horticulture department chuan, "Hardening hi Centre of Excellence-ahte leh Horticulture Centre-ahte tih theih a ni a, tun dinhmunah chuan hardening tihna tur hmun hi thlan fel a la ni lo," an ti. Hardening tih tawhte sem chhuah dan tur zawhna chu, "Mau/rua chi lo thleng a la awm lo a, hardening tih tawh a la awm loh avangin sem chhuah dan tur ruahmanna a la awm lo," tiin an chháng.

Hetih lai hian, Horticulture department-in thawh ṭhat lawmman, Best Horticulture State Award an dawn July 15, 2019-a an lawmnaah Horticulture changtu Zoramthanga, chief minister chuan khuallian niin thu a sawi a; raw chi eng emaw zat Mizorama a lo thlen tawh thu leh 3,000 vel chu hardening ti tura a ṭiak phun a nih thu a sawi a ni.

July 15, 2019-a a thusawiah hian CM Zoramthanga chuan, "A dik, a ṭha ngei ngei identify a ngai a, tunah chuan kan hmu ta a. Kar hmasa khan, Thawhlehni-ah a lo thleng a, Nilaini-ah hei 3,000 vel chu hardening ti turin a ṭiak kha kan phun ṭan a... A dawt lehah chuan sing khat kan rawn ti ang, an ti a. Maktaduai 10-te chu kan mamawh a nia, ka ti a," tiin a sawi.

Horticulture department SPIO-in zawhna a chhan danin, rua/mau hmanga intodelh tura hmalakna turah Mizorama rua leh mau awm sate bakah state páwn aṭangin raw chi ṭha lak luh tum a ni a, a chîn dan phungah te, thar chhuah kawngah te, a sâwngbàwlna kawngah leh market thlenga mumal taka kalpui a nih theih nan bawh bik ram neiin, cluster mode-a kalpui tum a ni.

Bamboo Project hi mumal taka kalpui a nih theih nan Mizoram sorkarin Bamboo Development Board a din tawh a, chu bakah chuan bungraw ṭul leh rua/mau thar chhuahte awlsam zawka phurh chhuah a nih theih nan a theih chin chinah bamboo link road lai turin PWD hnuaiah Bamboo Link Road Committee pawh din a ni tawh. Bamboo Project atan hian state sorkar ruahmanna piah lamah, Centrally sponsored scheme hnuaia National Bamboo Mission aṭangin mumal taka hmalak tum a ni bawk.