KHAWTHLIR

Chief secretary Lalnunmawia Chuaungo hoin nimin khan CS Conference Hall-ah North East Economic Corridor zir chianna leh hmalak dan tur sawiho a ni a, Asian Development Bank (ADB) aiawha Mizorama rawn zin mi 11 te, Mizoram sorkara secretary-te leh director-te an tel. Chief Secretary hian NE Economic Corridor atana Mizoram ṭangkaina tur kawngte leh mamawhte ADB aiawhte hnenah a thlen a ni.

Aizawl South-II bialtu MLA Lalchhuanthanga chuan nimin khan a bial chhunga damdawi-in pahnih - ITI Venga Urban Primary Health Centre leh Kulikawn Hospital-te a tlawh. MLA hi damdawi-in awmna venga local council leh tlawmngai pawl hruaitute leh, thawktute nen inkâwmin, damdawi-in tihchang­tlun dan tur an sawiho a; rawtna hrang hrangte chu a hlawhtlin theih nan theihtawp chhuah a tum thu a sawi.

YMA Sub-Headquarters, Serchhip hnuaia Anti-Drug Squad (SADS) duty centre thar, Zawlbûk tia vuah, YMA Sub-Hqrs Office building ami chu July 30, Thawhlehni zan khan Serchhip Sub-Hqrs YMA president R Sanghmingthanga'n a hawng. Hawnna inkhawm hi SADS chairman Lalzuiliana'n a kaihruai a; R Sanghmingthanga chuan, ruihhlo donaah nasa zawka hmalak a ṭul thu a sawi.

Sinlung Hills Council (SHC) General Session vawi kuana chu nimin khan SHC headquarters, Sakawrdaiah neih a ni a; council huam chhung tihhmasawnna tur thil pawimawhte an ngaih­tuah. SHC session hi chairman Lalmalsawma Darngawn-in a kaihruai a, chief executive member Lalthlamuana Hmar-in rorel tura kal khawmte lawmna leh fuihna thu a sawi. SHC-ah hian member 12 leh sorkar ruat (nominated member) mi pahnih an awm a; a huam chhungah khaw 31 a awm a ni.